Skip to content
رویټرز خبري آژانس په نړیوال بانک کې د خپلو پټو سرچېنو له قوله ویلي، نړیوال بانک به افغانستان کې له ښوونیز سکتور پرته د درېیو هغو سکتورونو پروژې له سره پیل کړي،چې په تیرې مارچ میاشتې کې یې ځنډولې وې.
د یاد آژانس په خبره،د افغانستان لپاره د نړیوال بانک دا پروژې د روغتیا، بزګرۍ او ژوند چارو برخو کې دي،چې ارزښت یې تر ۴۵۰ میلیونه ډالرو رسیږي.
سرچینې ویلي،د یادو درې پروژو په تطبیق کې به د نړیوال بانک سربېره د پیسو نړیوال صندوق، یوناما او اسلامي پراختیایي بانک هم ګډون کوي.
نړیوال بانک د څلورو پروژو لپاره ۶۰۰ میلیونه ډالر په یاد بانک کې د افغانستان بیارغونې مالي صندوق څخه له کنګل آزاد کړي وو.
سرچینه وايي:« نړیوال بانک د افغانستان غیر ښوونیزو پروژو د بیا پیل پریکړه وروسته له هغې وکړه،چې د افغانستان اقتصادي بحران لا ژور شو او د اکراین او روسیې جګړې له امله افغانستان کې د خوراکي او سون توکو بیې لوړې شوې.»
نړیوال بانک د ۶۰۰ میلیونه ډالرو په ارزښت د افغانستان لپاره په څلورو بېلابېلو برخو کې پلان شوې پروژې په تېره مارچ میاشت کې د اسلامي امارت هغې پریکړې په غبرګون کې وځنډولې،چې پر بنسټ یې د نجونو لپاره منځني ښوونځي او لیسې وتړل شوې.
د نړیوال بانک څلورمه پروژه د افغانستان ښوونیز سکتور لپاره وه،چې ارزښت یې تر ۱۵۰ میلیونه ډالرو رسېده.
د امریکا خزانې وزارت وړمه ورځ ویلي، د افغانستان بیارغونې مالي صندوق مرستندویه هېوادونه به د راتلونکې جمعې په ورځ غونډه وکړي،ترڅو د افغانستان پر اقتصادي او امنیتي وضیعت خبرې وکړي.
