نړیوال بانک له افغانستان سره د ۳۲۵ میلیونو ډالرو بلا عوضه مرستې تړون لاسلیک کړ.
مرسته به افغانستان کې پر اقتصادي پیاوړتیا، خدمتونو وړاندې کولو او اصلاحاتو برخه کې ولګول شي.
نړیوال بانک تمه لري چې له دې مرستې سره به وزارتونو او ښاروالیو کې اصلاحات راشي، ظرفیتونه به لوړ شي او په کور دننه به خلکو ته د کار زمینه برابره شي.
له ۲۰۰۲ کال راپدېخوا نړیوال بانک افغانستان سره د شاوخوا ۳۸۵ میلیارده دالرو مرستې ژمنه کړې چې ۱۰۳ میلیارده یې په بیلابیلو برخو کې مصرف کړي دي.
نړیوال بانک د چهارشنبې په ورځ افغانستان کې د درې مهمو پروژو ملاتړ وکړ چې ټولیز لګښت یې ۳۲۵ میلیونه ډالر اټکل شوی دی.
مالیې وزارت په ټوله کې د نړیوال بانک مرستې اغیزمنې یادوي.
پوهنه، روغتیا، بشري سرچینې، انرژي، بنسټیز کارونه، اصلاحات، کلیو پراختیا، کرنه او مالداري او ټولنیزه پراختیا هغه برخې دي چې نړیوال بانک له افغان حکومت او افغانانو سره ګډ کار کوي.
کابل کې د نړیوال بانک استازی وایي، له افغان حکومت سره مرسته کوي چې پرمختګ وکړي.
کابل کې د نړیوال بانک مشر شبان چوهدري داسې ویلي (( دغې مرستې سره به کورني بې ځایه شویو او بیرته راستنېدونکو ته د کار زمینه برابره شي، نهه ولایتونو کې به ښاري پراختیا رامنځته شي او د افغانستان د ملکي خدمتونو ادارې په مشرۍ ۱۵۰۰ کسانو ته به کاري بستونه رامنځته شي او ظرفیتونه به لوړ شي.))
د ۳۲۵ میلیونه ډالرو له جملې به ۲۰۰ میلیونه د کارموندنې برخه کې، ۵۰ میلیونه ښاري پراختیا او ۷۵ میلیونه ډالره به پر دولتي ادارو او وزارتونو کې پر اصلاحاتو او ظرفیت لوړونې ولګول شي.
