د صنعت او سوداګرۍ وزارت د سرپرست نور الدین عزیزي پر مشرۍ د اسلامي امارت ۶۰ کسیزه پلاوی پاکستان ته تللی او د دې هېواد له چارواکو سره يې پر بېلابېلو مسایلو خبرې کړې.
اسلام اباد کې د افغانستان سفارت له لوري خپره شوې خبرپاڼه کې ویل شوې، سرپرست وزیر نورالدين عزيزي د پاکستان د لومړي وزیر له مرستیال او بهرنیو چارو وزیر اسحاق ډار سره کتلي او د سوداګرۍ او ترانزيټ په ګډون يې پر یو شمېر مهمو مسایلو بحث او خبرې کړې دي.
د خبرپاڼې یوه برخه :« په دې لیدنه کې دواړو لوریو د دوه اړخیزو اړیکو د پراختیا، په پاکستان کې ميشت افغان مهاجرينو د باعزته ستنېدو، د سوداګرۍ پر ودې او د ترانزیټ بهیر د اسانتیاوو پر موضوعاتو خبرې وکړې. د افغانستان پلاوي د دواړو هېوادونو ترمنځ د همکاریو پیاوړتیا، د اقتصادي وضعیت د ښهوالي لپاره مهمه وبلله او د صادراتو او وارداتو په برخه کې یې د لازیاتو اسانتیاوو غوښتنه وکړه.»
اسلام اباد کې د افغانستان سفارت په خبرپاڼه کې راغلي چې په دې کتنه کې د دواړو هېوادونو ترمنځ د سوداګرۍ او ترانزیټ په برخو کې د شته ستونزو پر حل هم ټینګار شوی.
ورته وخت کې د اقتصادي چارو شنونکي بیاد مذاکراتو له لارې له پاکستان سره د سوداګریزو اړېکو رغول او په دې برخه کې د شته ستونزو حل اړين ګام بولي.
د اقتصادي چارو شنونکی نور الله عزیز وايي:« په افغانستان کې شرایط تر بل هر وخت ډېر ترینګلي دي، که هغه د مهاجرینو بېرته راتګ دی، که هغه په سیاسي برخه کې ځینې ستونزې دي له نړیوالو سره د اړیکو په برخه کې او یا هم په اوسنیو شرایطو کې د بېکارۍ او مهاجرتونو لړۍ ده، دا ټول پر افغانستان باندې د فشار الې دي او د دې مدیریت کول له هېوادونو سره د ښو اړیکو پر بناء باندې یا هم له ګاونډیو سره په خبرو باندې تمرکز ډېر اساسي رول لوبوي.»
شنونکي وړاندیز کوي چې اسلام اباد او کابل دې د سوداګریزو اړېکو پر وړاندې شته ننګونې د خبرو اترو له لارې دايمي حل کړي او داسې تګلاره دې عملي کړي چې د دواړو هېوادونو ترمنځ د سوداګریزو اړيکو د پراختيا لامل شي.
د يادونې وړ ده چې پاکستان ډېری وخت د افغانستان د تازه میېوو او سبزیجاتو د رسېدو پر مهال تورخم لار تړي چې له امله يې هر کال افغان پانګوالو ته ميليونه افغانۍ زيان اوړي.
