د کونړ ـ جلال آباد پر لویه لار د کوز کونړ ولسوالۍ اړوند د پنېرو هټیو پر دې لاره د تلوونکو او راتلوونکو خلکو پام ځانته را اړولی.
د پنېرو یو شمېر پلورونکي وايي، په وروستیو کې د پنېرو د پېر او پلور بازار خراب شوی چې په دې برخه کې د اړوندو ادارو د مرستې غوښتنه کوي.
د ننګرهار په کوز کونړ ولسوالۍ کې د پنېرو یو تن پلورونکی وايي:« له دې ځایه ټولو ۳۴ ولایتونو ته پنېر ځي. بهر ته هم ځي، اوس هم ما شاوخوا یو من پنېر ورکړ، امریکا ته یې یوړو.»
د ننګرهار په کوز کونړ ولسوالۍ کې د پنېرو یو بل پلورونکی بیا وايي:« هټۍ دې راته جوړې کړي، شیشې ولګوو، څه مرسته دې هغوی وکړي او څه به موږ وکړو، نو په دې سره به زموږ پنېر له ګردونو هم بچ شي.»
پنېر پلورونکي وايي، د کوز کونړ ولسوالۍ پنېرو د پلورنې په موخه د هېواد له ګوټ ګوټ سیلانیان او د پنېرو پېرېدونکي ورته راځي.
اخوا د پنېرو پېرېدونکي بیا وايي، د دغې ولسوالۍ پنېر له سوچه شېدو جوړ، ښه خوند او مزه لري چې له همدې امله یې پر دغې لارې د تګ راتګ پرمهال له ځانه سره وړي.
د پنېر یو تن پېرېدونکی وايي:« شاوخوا شپږ میاشتې وشوې، چې زه دا پنېر وړم. دا پنېر د فشار لرونکو کسانو لپاره ډېر ښه دی. موږ په کور د فشار لرونکي ناروغان لرو، د هغوی لپاره دا ډېر ښه دی، چې مالګه په کې لږ کمه ده. د دې پنېر کیفیت ډېر ښه دی.»
په ورته مهال د ننګرهار د کرنې، اوبو لګولو او مالدارۍ ریاست مسوولین د پنېر پلورونکو ستونزې مني او زیاتوي؛ هڅه کوي چې پنېر پلورونکو ته د مناسب بازار ترڅنګ له هېواده بهر د لېږد زمینه هم برابره کړي.
د دغه ریاست د مالوماتو له مخې، د دغه ولایت په کوز کونړ، دره نور او جلال آباد ښار کې د پنېر پلورنې لسګونه هټۍ شتون لري، چې سلګونه کسانو ته په کې د کار زمینه برابره شوې ده.
