په ننګرهار ولایت کې د اوسپنې ویلي کولو صنعت له پخوا غوړیدلی چې د ورځې لسګونه ټنه اوسپنه ویلي کوي.
د دغه ولایت په شیخ مصري صنعتي پارک کې د اوسپنې د ویلې کولو یوه کارخونه کې هره ورځ لسګونه ټنه اوسپنه ویلې کېږي.
د یادې کارخونې مسوولین وايي، دغه صنعت ننګرهار کې د غوړیدو په حال کې دی او د دې صنعت اړوند ټول هغه توکي چې پخوا به له بهرنیو هېوادونو واردیدل اوس همدلته په افغانستان او بیا ننګرهار کې جوړیږي.
د اوسپنې ویلې کولو کارخونې مشر عابد وايي:« د شکر ځای دی. که تاسو مخکېنی وخت یاد کړئ، همدا د ګول سیخ ، همدا ګاډر ، همدا اوسپنیز توکي به موږ له تاجیکستان، ایران او پاکستان وارد کول. الحمد الله نن همدا توکي په خپل هېواد کې افغانستان کې په بېلابېلو ولایتونو کې جوړېږي.»
په دغه کارخونه کې له۱۰۰ ډېرو کسانو ته د کار زمینه برابرې شوې، خو کاریګر ټینګار کوي چې سرپرست حکومت دې د صنعت کارانو ملاتړ ته په دوام ورکولو سره هېواد کې پانګه والۍ ته زمینه برابره کړي.
د کارخونې یو تن کاریګر وايي:« د کاریګر په توګه زه د خپل اسلامي امارت له لوړپوړو چارواکو دا هېله کوم چې د صنعت کارانو کومې ستونزې دي، د برېښنا ستونزه او یاهم نورې ستونزې، باید دا ورته حل کړي. موږ خپله غریب کاره خلک یو، د دې کارخونو ستونزې ګورو او حالات یې ګورو.»
د کارخونې یو بل کاریګر بیا وايي:« پلور مو زیات دی، د افغانستان اسلامي امارت له مجاهدینو مو هېله ده چې کارخونې نورې هم زیاتې کړي، ترڅو خوار او غریب په کې کار وکړي او کورنۍ ته یو څه نفقه پیدا کړي.»
د ننګرهار صنعت او سوداګرۍ ریاست د سوداګریزو چارو امر شاکر الله ستانکزی وايي، اوس مهال دغه ولایت کې د اوسپنې ویلې کولو ۱۴ کارخونې فعالیت کوي چې تولیدات یې له ننګرهار سربېره د افغانستان نورو ولایتونو ته هم لېږدول کېږي.
ستانکزی په دې اړه وايي:« موږ په ننګرهار کې د اوسپنې ویلې کولو په برخه کې ۱۴ کارخونې لرو چې دلته فعالیت کوي. له کابل وروسته د اوسپنې ویلې کولو برخه دلته ډېره فعاله ده. موږ نور ځان بسیاینې ته نږدې شوې یو. په دې برخه کې دولت ورسره پوره همکار دی. د اوسپنې قاچاق بند دی. هېڅوک نه شي کولی چې اوسپنه قاچاق کړي.»
د صنعت کارانو په خبره، که سرپرست حکومت دوی ته د بریښنا زمینې برابرولو سربېره د خامو موادو او په معیاري ډول د صنعتي پارک جوړېدو برخه کې همکاري وکړي، نو ننګرهار ولایت کې به صنعت لا پرمختګ وکړي.
