د ریاستالوزراء اقتصادي مرستیال ملا عبدالغني برادر په مشرۍ د ملي تدارکاتو کمیسیون په نوبتي غونډه کې د یاد کمیسیون له لوري د ۱۰.۲ میليارد افغانیو په لګښت ۲۲ پروژې منظورې شوې دي.
د اقتصادي معاونیت د خبرپاڼې له مخې، غونډې ته له اجنډا سره سم ۳۷ پروژې د منظورۍ لپاره وړاندې شوې وې چې له بحث وروسته ۲۲ هغه يې منظورې او په ۷ نورو پروژو کې بیا یو لړ بدلونونه راغلي.
په خبرپاڼه کې ویل شوي، همداراز د څلورو پروژو په اړه ټاکلشویو کمېټو ته دندې سپارل شوې چې د پروژو د قېمتونو په اړه له ګټونکو شرکتونو سره خبرې وکړي او راپور یې د ملي تدارکاتو کمیسیون مشرتابه ته وړاندې کړي.
د رياستالوزرا اقتصادي معاونیت ویلي: « په منظورشویو او تعدیلشویو پروژو کې د قوشتېپې کانال دویم فاز، کندهار کې د احمدشاه بابا نړیوال هوايي ډګر ترمینل او پارکینګ جوړول، د فراه ولایت د مرکز اړوند د مسافرو او باروړونکو موټرونو د ترمینل جوړول، د سمنګان ولایت له ایبک څخه روی دو اب پورې د ۲۰ کیلومټره سړک جوړول، د بدخشان ولایت په یاوان، د پکتیا ولایت په ډنډپټان او د هرات ولایت په ګلران ولسوالیو کې د عمومي روغتونونو جوړول او په مختلفو ولایتونو کې د برېښنا رسونې او وېش پروژو د پاتې چارو بشپړول شامل دي.»
د اقتصادي چارو څارونکي بیا په هېواد کې دا ډول لویې پروژې له اقتصادي اړخه مهمې بولي او وایي، له دې سره به لسګونه زره خلکو ته کاري فرصتونه هم برابر شي.
د څارونکو په خبره، حکومت باید هڅه وکړي چې یادې پروژې هغو شرکتونو ته وسپاري چې ټولې چارې له ښه کیفیت سره پر مخ یوسي.
د اقتصادي چارو شنونکی عبدالنصیر رښتیا وايي: « کله چې پراختیايي پروژې پيل کېږي، ورسره د هېواد اقتصادي وضعیت ښه کېږي؛ ځکه چې هره پروژه خلکو ته کاري فرصتونه برابروي او نورې برخې هم له ځان سره فعالې ساتي. دا نه یوازې د زیربناوو جوړولو په برخه کې اساسي کار ترسره کوي بلکې خلکو ته شغلي فرصتونه هم چمتو کوي.»
د اقتصادي چارو شنونکی محمدیونس ځدراڼ وايي: « د ملي تدارکاتو کمیسیون له خوا د نویو پروژو منظوري او لپاره یې په کافي اندازه بودیجه ځانګړې کېدل، د افغانستان د اقتصاد او پرمختګ په برخه کې یو مثبت ګام دی. په دې سره خلکو ته د کار زمینه هم برابرېږي، خو باید چارې یې داسې شرکتونو ته ورکړل شي چې کار په ښه کیفیت او کوالټي ترسره کوي.»
د ریاست الوزراء اقتصادي معاونیت په خبرپاڼه کې دا هم راغلي چې دغه ټولې ۲۲ پروژې د افغانستان اسلامي امارت له داخلي عوايدو تمویلېږي.
