د ریاست الوزرا اقتصادی مرستیال تورغونډۍ بندر کې د ترکمنستان ملي رهبر سره په لیدنه کې د ټاپي پروژې د چارو پرچټکتیا، له یاد هېواد سره د اقتصادي دهلېز پر رامنځته کولو او اقتصادي همکاریو ټینګار وکړ.
په لېدنه کې د رياست الوزرا اقتصادي مرستيال ملا عبدالغني برادر ويلي، ټاپي د هېوادونو ترمنځ د سیمه ییزې همکارۍ او اقتصادي یووالي نښه ده او دوی هڅه کوي چې افغانستان د سیمه ییز اتصال او اقتصادي راکړه ورکړې په مرکز بدل کړي.
د رياست الوزرا اقتصادي مرستيال ملا عبدالغني برادر زیاته کړې:« زموږ لیدلوری یوازې تر ټاپي پروژې محدود نه دی بلکې موږ د افغانستان او ترکمنستان ترمنځ د اقتصادي دهلېز د پراختیا په هدف کار کوو؛ دا دهلېز یوازې د یوې پروژې نوم نه دی بلکې د یو ه ستر سټراټیژیک هدف پر لوري حرکت دی چې په کې د ټاپ د پنځه سوه برېښنا مزي د انتقال پروژه، د رېل ګاډي پټلۍ جوړونه، سړکونه، لوجسټیکي مرکزونه او ګڼ شمېر نورې اقتصادي پروژې شاملې دي.»
په ورته مهال، د ترکمنستان ملي رهبر قربان قلي بردي محمدوف د ټايي په څېر د ورته پروژو تطبیق د دواړو هېوادونو ترمنځ د اړېکو پیاوړتيا لامل ګڼي.
د ترکمنستان ملي رهبر قربان قلي بردي محمدوف ویلي: « د داسې لويو پروژ تطبیق د دوستانه اړېکو د پیاوړتيا لامل ګرځي او د دواړو هېوادونو د نېک نيت او دوستانه اړېکو ثبوت وړاندې کوي.»
مسوولان همداراز وایي، اوسمهال د ټاپي ګازو نل لیکه ۱۴ کیلومټره غځول شوې او په پام کې ده چې د ۱۵۳ کیلومټرو په اوږدوالي تر هرات ښاره د دې نل لیکې غځولو چارې د ۲۰۲۶ زیږدیز کال تر پایه بشپړې شي.
د اسلامي امارت مرستیال ویاند حمدالله فطرت وايي: « دا پروژه چې اوس یې د افغانستان په خاور کې ۱۴ کیلومټره بشپړه شوې، تر هراته به د ۱۵۳ کیلومټرو په اوږدوالي غځېږي. د دې پروژې د دویمې برخې چې شاوخوا سل کیلومټره کېږي، سیمه ورته برابره شوې او نږدې ۷۰ کیلومټره ساحه هواره شوې او د جغل په توګه سړک هم ورته جوړ شوی دی.»
د کانونو او پټرولیم وزارت ویاند همایون افغان په دې اړه وايي: « کله چې دا پروژه هرات ته رسېږي، نو صنعتي پارکونه، کورونه او عام وګړي به له دې پروژې برخمن شي.»
بله خوا، د اقتصادي چارو کارپوهان هم د ټاپي پروژې بشپړېدل د هېوادونو ترمنځ د سوداګریزو اړیکو پیاوړتیا او په کور دننه د صنعتي ودې لپاره ګټور بولي.
ټاپي د هېواد په کچه یوه ستره اقتصادي پروژه ده چې په لومړي ځل یې ۱۴ کیلومتره نل لیکه غځول شوې او دواړه هېوادونه یې د بشپړیدو لپاره د پوره هڅو ډاډ ورکوي.
