د ریاست الوزرا مقام په معاملاتو کې د افغانیو کارولو او د اسعارو، سرو زرو او قېمتي ډبرو د قاچاق مخنیوي په اړه حکم صادر کړی او امنیتي او کشفي ارګانونو، صرافانو، سوداګرو او عامو خلکو ته په کې سپارښتنې شوې.
سرپرست حکومت دغه پریکړه داسې مهال کوي چې په تېرو دوو اوونیو کې د ډالرو پر وړاندې د افغانیو ارزښت د تېرو میاشتو په پرتله ټیت شوی، خو د ریاست الوزرا په دې حکم کې یې د ثبات لپاره سپارښتنه شوې چې ټول پولي معاملات او راکړه ورکړه دې په افغانیو وشي.
د ریاست الوزرا په حکم کې راغلي: « ټولو سوداګرو، صرافانو، د قېمتي ډبرو کاروباریانو او هېوادوالو ته لارښوونه کېږي چې د راکړې ورکړې پر مهال افغانۍ وکاروي. هېڅوک نه شي کولی د هوايي ډګرونو له لارې له ۵۰۰۰ زیات او د ځمکې له لارې له ۵۰۰ څ زیات ډالر په نغدي ډول له ځان سره بهر ته ولېږدوي.»
د ریاست الوزرا په حکوم کې له دې پرېکړې سرغړونکو ته خبرداری ورکړل شوی چې له ټاکل شوې اندازې د زیاتو پيسو لیږدول جرم دی او ترسره کوونکي یې په بند محکوم شي.
د ریاست الوزرا د حکم په بله برخه کې راغلي: « هغه اسعار او سره زر چې له سرغړونکو نیول کیږي، هغه به د ریاست الوزرا تر لزوم دید پورې د افغانستان بانک کې ساتل کیږي. هېواد ته د سیمې د هېوادونو اړوند اسعار راوړل ممنوع دي. همدارنګه له هېواد بهر د اسعارو، سرو زرو، قېمتي ډبرو او تاریخي آثارو د قاچاق مخنیوی د اسلامي امارت د استخباراتو لوی ریاست، د کورنیو چارو او دفاع وزارتونو مسوولیت دی.»
د اقتصادي چارو شنونکي وايي، دا ډول اقدامات د افغانۍ پولي ثبات ساتلی شي خو د ډالرو قاچاق، هېواد ته د وارداتو لوړ ګراف او پر بانکي سیسټم وضع شوي محدودیتونه هغه ننګونې دي چې د دوی په خبره، د ډالرو پر وړاندې یې د افغانۍ ارزښت بې ثباته کړی.
د اقتصادي چارو شنونکی محمد یونس ځدراڼ وايي: « زما نظر دا دی چې افغانۍ باید په هر صورت ثابته پاتې شي، راکړه ورکړه باید په افغانیو وشي، هر ډول معاملې پر افغانیو وشي، همدارنګه د ډالرو د قاچاق مخه ونیول شي. هغه مکانېزم چې دوی ورته جوړ کړی یا یې جوړوي، په دې کې د تجارانو او صرافانو نظرونه واخیستل شي او داسې مکانېزم جوړ شي چې افغانۍ د ډالرو له امله خپل ثبات له لاسه ور نه کړي او تل ثابته پاتې شي. په دې سره دوی کولی شي په بازار کې منفي تأثیرات له منځه یوسي او چا ته زیان هم ونه رسېږي؛ همدارنګه په بازار کې نرخونه هم تغییر ونه کړي.»
د یادولو ده چې په دې وروستیو کې د ډالر پر وړاندې د افغانیو ارزښت د تېر ۲۰۲۴ کال د اکټوبر له وروستیو راهیسې د لوېدو په حال کې دی، خو د افغانستان بانک ټولو صرافانو او عامو خلکو ته ډاډ ورکوي چې د افغانۍ ثبات ورته لومړیتوب لري.
