د جوزجان ولایت د مرکز شبرغان له نفتي سیمو بلخ ته د طبیعي ګازو د انتقال پروژه د بشپړېدو وروستي پړاو ته رسېدلې.
د مسوولینو په خبره، دا پروژه د څه باندې ۶۱۰ میلیون افغانیو په لګښت پلې کېږي او شاوخوا ۹۴.۵ کیلومټره اوږدوالی لري. دا نل لیکه به له بشپړېدو وروسته هره ورځ ۱.۵ میلیون متر مکعبه طبیعي ګاز د بلخ صنعتي پارکونو او د کود برق فابریکې ته ولېږدوي.
د افغان ګاز ریاست د چارواکو له معلوماتو سره سم، د دې نل لیکې یوازې تخنیکې کارونه پاتې دي چې تر بشپړېدو وروسته به يې ګټه اخستنې ته وسپاري.
د افغان ګاز رییس مولوي اخترمحمد منصور وايي: « پایپ لین له جوزجان څخه تر مزارشریف پورې غځول شوی او کارونه یې په بشپړه توګه پای ته رسېدلي. د دې پایپ لین یوازې د سېل برونو او ضد زنګ برخه پاتې ده چې هغه هم اعلان ته سپارل شوې او سږ کال به بشپړ شي. د دې پروژې له بشپړېدو سره به موږ وکولی شو چې کود برق فابریکې او صنعتي فابریکو ته ګاز ورکړو.»
بله خوا، مزارشريف ښار کې یو شمېر صنعتکاران دا پروژه د بلخ صنعتي ودې لپاره مهم ګام بولي او زیاتوي چې طبیعي ګاز نه یوازې د صنعت لپاره ارزانه انرژي ده بلکې د چاپېریال د ککړتیا په کمېدو کې هم مهم رول لري.
صنعتکار عبدالرشید احمدزی وايي: « دا ډېره ښه خبره ده، که چېرې موږ ته ګاز راکړل شي، چاپېریال ککړونکي سوخت به بند شي او د چاپېریال له ککړتیا به هم مخنیوی وشي.»
صنعتکار سید جاوید سادات وايي: « موږ دا مهال د برېښنا انرژي له خپلو ګاونډیو هېوادونو پېرو، خو که چېرې دا انرژۍ له داخلي سرچینو او ګازو څخه تأمین شي، دا به د انرژۍ او دغه راز د پیسو په مصرف کې سپما وشي او له امله به یې د توکو بیې ټیټې شي.»
له شبرغانه بلخ ته د طبیعي ګازو دا نل لیکه چې ډېره برخه يې صنعتي پارکونو ته ځانګړې شوې، د اقتصادي برخې شننونکي يې د صنعتي ودې او ځانبسیاینې پر لور مهم ګام ګڼي.
د اقتصادي چارو شنونونکی عبدالنصیر رښتیا وايي: « که چېرې موږ له خپلو کورنیو سرچینو ګټه واخلو، د ښکاره خبره ده چې یوه زیاته اندازه بهر ته تلونکې پيسې به سپما شي او دغه راز به ګڼو خلکو ته هم د کار زمینه برابره شي. کله چې تاسو ارزانه ګاز او نفتي توکي په واک کې ولری، لپاره یې سترې کارخونې جوړېږي، تولیدات زیاتېږي، کارونه پيدا کېږي او په ټولیزه توګه اقتصاد ورسره وده کوي.»
په جوزجان کې د شبرغان له نفتي سیمو بلخ ته د نل لیکې غځولو چارو بشپړېدو خبر داسې مهال ورکول کېږي چې څو ورځې وړاندې د افغان ګاز ریاست د جوزجان يتيم تاق نفتي بلاک کې له ګازو د برېښنا تولید په موخه، له دوو خصوصي شرکتونو سره د قراردادونو لاسلیک خبر ورکړل شو.
يادو شرکتونو ته به له دې بلاک څخه په ورځني ډول څه باندې ۶۰۰ زره مترمکعب ګاز ورکول کېږي. ټاکل شوې له دغو ګازو د هرې ورځې په کچه ۲ زره ١٦٠ مېګاواټه برېښنا تولید شي چې بلخ او جوزجان ولایتونو کې به پر عامو خلکو سربېره، صنعتي پارکونو ته هم ووېشل شي.
