په جوزجان ولایت کې تولید شوې افغاني غالۍ اوس مهال په نړیوال بازار کې د پاکستان پر ځای د افغانستان په نوم پلورل کیږي.
شهرستان قالین د جوزجان د آقچې ولسوالۍ پخوانی نوم دی؛ دغه نوم له همدې لاسي صنعت ور پاتې شوی و.
له ډول ډول تارونو په لاس اوبدل شوې غالۍ نه یوازې د دې ولایت یو مهم اقتصادي محصول ګڼل کېږي، بلکې د یوې فرهنګي او هنري نښې په توګه هم ځانګړی نوم او شهرت لري.
د غالۍ اوبدلو یوې کارخونې مسوول عبدالغفاروایي، هره میاشت تر دوه زرو مترو مربع افغاني غالۍ اوبي او زیاته برخه یې بهرنيو بازارونو ته وړاندې کېږي.
عبدالغفار زیاتوي: « موږ په میاشت کې تر دوه زره مېترو تولید لرو. ۱ زر او ۸۰۰ مترمربع زه خپله بهر او پاتې نور کابل ته استوم. زموږ د تولیداتو ۱۵ سلنه پاکستان ته ځي؛ هلته زموږ تولید ښه پېرودونکي لري.»
د جوزجان د غالۍ اوبدلو په دې لویه کارخونه کې شاوخوا ۳۵۰۰ تنو ته کاري فرصتونه هم برابر شوي دي.
د غالۍ پر وینځلو او بسته بندۍ باندې بوخت کارګران خوښ دي چې په کور دننه د عاید ترلاسه کولو فرصتونه ورته چمتو شوي.
د غالۍ اوبدلو کارخونې یو کارګر جان محمد وايي: « زه دلته کار کوم او د میاشتې له ۸ تر ۱۰ زرو افغانیو عاید لرم. په دې کارخانه کې څه کم ۱۰۰ تنه پر کار بوخت دي.»
د کار خونې یو تن بل کارګر نورمحمد وايي: « زه د میاشتې تر ۶ زرو عاید لرم، شکر دی روزګار مې ښه روان دی.»
په همدې حال د جوزجان صنعت او سوداګرۍ ریاست مسوولین د غالیو د قاچاق مخنیوي خبره کوي او وايي، د پخوا پرتله د افغانۍ غالیو د قاچاق مخه نیول شوې ده.
د مسوولینو په خبره، اوس مهال افغاني غالۍ بهرنیو بازارونو ته د پاکستان په ځای د افغانستان په خپل نوم وړاندې کېږي.
د جوزجان د صنعت او سوداګرۍ رییس نیاز محمد تواب وايي: « د سوداګرۍ او صنایعو وزارت له ګاونډیو او بهرنیو هېوادونو او دغه راز له خصوصي سکټور سره د غالیو د صادراتو په اړه همغږي کړې، اسانتیاوې یې جوړې کړې او ستونزې هوارې شوې دي.»
د جوزجان د صنعت او سوداګرۍ ریاست د مالوماتو پر بنسټ، یاد ولایت کې د غالیو د تولید او پروسېس څه باندې ۱۰۰ کارخونې شته چې په کې زرګونو کسانو ته د کار زمینه برابره شوې ده.
