د کابل او استانې ترمنځ د اقتصادي اړیکو پراختیا نوي باب پرانستل شو. د صنعت اوسوداګرۍ وزیر کابل ته د قزاقستاني پلاوي د سفر په پای کې وايي، د افغانستان او قزاقستان ترمنځ د اقتصادي همکاریو نوي قرار دادونه شوي چې له دې سره به د دواړو هېوادونو د سوداګرۍ کلنی حجم نږدې درې میلیارده امریکايي ډالرو ته لوړ شي.
نورالدین عزیزي وايي: « موږ د تجارت لپاره ۳ میلیارده ډالره اندازه ټاکلې وه او غواړو چې دې هدف ته نږدې شو. نن ورځ د دې لپاره ښه فرصت برابر دی.»
د صنعت او سوداګرۍ وزیر دغه راز وايي، د دواړو هیوادونو د دولتي او خصوصي سکټورو نو ترمنځ د اقتصادي اړیکو پراختیا لپاره، د ګډې پانګونې، سوداګرۍ پراختیا، لوړو زده کړو، اوسپنې پټلۍ تړون چې۵۰۰ میلیونه امریکايي ډالر پانګونه پرې کېږي، دافغانستان د ټرانزیټ په برخو کې اسانتیاوي رامنځ ته کېدل، د دواړه هېوادونو د سوداګرۍ ټاکلي سقف ته نږ دې شوی.
دوی زیاتوي، د قزاقستان له لارې له چین سره د وصل کېدو په یوه نوي مسیر هم خبرو پیل شوې او په کې د افغان ټرانزیټ لپاره ځانکړي تخفیفونه هم په نظر کې نیول شوي. دغه کار د دواړو هېوادونو ترمنځ د اقتصادي اړیکو پراختیا نور هغه موضوعات وو چې بحثونه ورباندې شوي.
د صنعت اوسوداګرۍ وزیر په دې اړه وايي: « د لوړو زده کړو له وزارت سره هم یو پروګرام مخکې وړو چې په کې زموږ د خلکو روزنه او د ځینو مسلکونه زده کړه په کې شامل دي. دا پروګرام به ډېر ژر پرانستل شي. همدارنګه قزاقستان په افغانستان کې د رېل کرښو جوړولو یو لوی قرارداد په پام کې لري چې ۵۰۰ میلیون ډالره به پرې پانګونه کېږي. د دې پروژې پر عملي جزئیاتو هم خبرې وشوې او هوکړې ته نږدې شوي یو.»
په ورته مهال، د قزاقستان مرستیال لومړي وزیر ویلي چې افغانستان ته يې سفر له اقتصادي پلوه له لاسته راوړنو ډک و او زیاتوي چې د دې هېواد یو شمیر پانګوال لېواله دي چې په افغانستان کې د سوداګریزو اړیکو د پراختیا ترڅنګ، پانګونه هم وکړي.
د قزاقي چارواکو په وینا، په دواړه هېوادونو کې د اقتصادي اړیکو پراختیا لپاره لوړ ظرفیتونه شته چې اوس ترې د ګټه اخستلو لپاره مناسبه فضا رامنځته شوې ده.
سریک ژومانګارین وايي: « د افغانستان او قزاقستان ترمنځ د اقتصادي اړیکو د پراختیا په برخه کې لوړ ظرفیتونه شته. موږ د دې سفر په لړ کې د دواړو هېوادونو ترمنځ د اقتصادي اړیکو پراختیا باندې خبرې وکړي چې هغه د ټرانزیټ، ټرانسپورټ، سوداګرۍ او اوسپنې پټلۍ باندې پانګونه په کې شامل دي. یو شمېر قزاقي پانګوال لېواله دي چې په افغانستان کې پانګونه هم وکړي.»
د صنعت او سوداګرۍ وزارت وايي، د افغان او قزاقستاني تولیداتو د ګډ نندارتون جوړېدو او د دواړو هېوادونو ترمنځ د ترسره شویو دوه اړخیزو غونډو په پایله کې، د خصوصي سکټورونو ترمنځ د همکاریو ۲۵ هوکړې لاسلیک شوې دي.
د وزارت د معلوماتو له مخې، یادې هوکړې د درملو، سبزیو، وچو او تازه مېوو، اوړو، غنمو او غوړیو د وارداتو او صادراتو ترڅنګ د بانکي همکاریو په برخو کې شوې دي.
چارواکي وایي، د دغو هوکړو موخه د سوداګریزو اړیکو پراختیا، د پانګونې فرصتونو زیاتول او دغه راز د افغانستان او قزاقستان ترمنځ د اقتصادي همکاریو پیاوړتیا ده.
