د اطلاعاتو او فرهنګ وزارت او ملي موزيم په نوښت د موزيم نړيواله ورځ ونمانځل شوه.
د دې ورځې په نمانځغونډه کې چارواکو وویل، د افغانستان په ملي موزيم کې داسې آثار هم شته چې مخينه يې شاوخوا ۵ زره کلونو ته رسېږي.
دوی په تېرو څو کلونو کې د تاريخي آثارو ساتنه او رغول او بهر ته يې د قاچاق مخنيوی خپلې لاسته راوړنې ګڼي او ډاډ ورکوي چې د بل هر وخت پرتله اوس مهال بهر ته د يادو توکو د قاچاق مخه په جدي توګه نيول شوې ده.
د اطلاعاتو او فرهنګ وزارت د فرهنګ معين عتیقالله عزيزي وايي:« که څوک په دې سترګې پټوي چې په تېرو څلورو کالو کې د افغانستان د تاریخي آثارو د حفاظت لپاره چې کوم ګامونه پورته شوي، بیلګه یې په تېرو ۲۰ کالو کې څه چې په تېرو ۴۰ کالو کې هم نه لیدل کېږي. دلته د قاچاق مخه ونیول شوه، قاچاقبر محاکمو ته وسپارل شول، د افغانستان سرحدونه محفوظ شول او د افغانستان له هوايي ډګرونو د قاچاق مخه ونیول شوه.»
عزیزي د تاريخي آثارو په ساتنه کې د نړيوالو بنسټونو رول مهم بولي او له همدې کبله غوښتنه کوي چې ياد بنسټونه دې د افغانستان تاریخي آثارو پر ساتنې او رغولو پانګونه وکړي.
عزیزي په دې اړه وايي: « موږ اوس د نړۍ پر سطحه دا خبره کولی شو چې د افغانستان ټول تاریخي آثار چې د بېلابېلو دورو او پېړیو نمایندګي کوي، د افغانستان په ملي موزیم کې شتون لري او ساتل کېږي. موږ پر نړیوالو هم غږ کوو چې د افغانستان له دې فرهنګي، لرغوني او تاریخي موزیم سره همغږي ولري او دلته پانګونه وکړي.»
په همدې حال کې ايراني چارواکي ډاډ ورکوي چې هېواد يې له افغانستان سره د هنر او فرهنګ د ودې په برخه کې هر ډول همکاريو ته چمتو دی.
کابل کې د ايران سفارت فرهنګي اتشه سید روحالله حسیني وايي: « په کابل کې د ایران اسلامي جمهوریت د فرهنګي استازي په توګه، هغو اړیکو ته په کتو چې د اطلاعاتو او فرهنګ وزارت سره یې لرو، همدلته د دې چمتوالی اعلانوم چې دواړه هېوادونه کولی شي په مختلفو برخو کې د موزیم په مختلفو څانګو او دغه راز د لرغونو آثارو او تاریخي آبداتو د بیا رغونې په برخه کې همکاري وکړي.»
ملګرو ملتونو د می ۱۸مه په ۱۹۷۷ زېږديز کال د موزيم نړيوالې ورځې په توګه ونوموله.
د دې ورځې له نومولو د ملګرو ملتونو موخه په ټوله نړۍ کې د موزيمونو پراختيا او ځايي فرهنګونو له منځه تلو مخنيوی دی.
