د صنعت او سوداګرۍ وزارت مسوولان وايي، د چابهار بندر له لارې به د افغاني محصولاتو صادرولو لړۍ لا پراخه کړي.
د دوی په خبره، په چابهار بندر کې ټولې هغه ستونزې د ایران له لوري حل شوې دي چې په تېر کې افغان سوداګر ورسره مخ وو.
د صنعت او سوداګرۍ وزارت چارواکي ډېر ژر د هغه پلان عملي کولو خبر هم ورکوي چې له مخې به یې له چابهار بندر څخه پراخې ګټه اخیستنې او د سوداګرۍ پراختیا ته زمینه برابروي.
چارواکي زیاتوي، په پلان کې ده له ایران سره د ياد بندر په مسیر کې د ګڼو لوجیسټیکي، ټرانسپورټي او ټرانزیټي شرکتونو رامنځته کېدو ترڅنګ، د نیمروز په میلک سیمه کې د افغانستان د تاسیساتو ظرفیتونه هم لوړ شي.
د صنعت او سوداګرۍ وزارت د دفتر رییس محمد الله بختیار وايي: « د افغانستان د صنعت او سوداګرۍ وزارت د وروستیو هڅو له مخې، د ایران حکومت افغانانو ته د چابهار بندر له لارې د ټرانزیټي لګښتونو په کچه کې د ایران د نورو بندرونو په پرتله،۵۰ سلنه تخفیف ورکړی. چابهار بندر افغانستان ته زمینه برابروي چې نړیوالو اوبو او سمندر ته لاره پيدا کړي. همدارنګه د چابهار – زرنج لاره د ایران د نورو آبي بندرونو په پرتله لنډه، خوندي او اقتصادي ده. دا لاره افغانستان له منځنۍ او جنوبي آسیا سره نښلوي او زموږ هېواد ته د سیمي د تاریخي تجارتي څلور لارې رول لوبوي.»
د صنعت او سوداګرۍ وزارت معلومات ښيي چې تېر کال د چابهار بندر له لارې د افغانستان د سوداګرۍ کچه څه باندې دوه میلیارد ډالر وه چې زیاته برخه یې واردات وو. خو د مسوولانو په خبره، هڅه کېږي راتلونکی کال دغه کچه نوره هم لوړه شي او د افغانستان توکي له همدې لارې د جنوبي او مرکزي اسیا پر مارکېټونو سربېره د اورپا بازارونو ته هم ورسېږي.
د صنعت او سوداګرۍ وزارت ویاند اخندزاده عبدالسلام جواد وايي: « زموږ د شمېرو له مخې، افغانستان د چابهار له لارې په ۲۰۲۴ کال له ۱۲۷ میلیون ډالرو پورته صادرات لرل او د ۲ میلیارده ۵۳۴ میلیون ډالرو په ارزښت یې هم واردات درلودل..»
سوداګر هم د دې اقدام له امله خوښ دي او وايي، د چابهار بندر له لارې یې هند ته صادرات زیات شوي او ټولې هغه ستونزې هوارې شوې دي چې په دې لار کې یې درلودې.
د دوی په خبره، اوس د چابهار بندر په مسیر کې سوداګریزو بېړیو هم د منځنۍ کچې انتقالات پیل کړي او په دې توګه کولی شي افغاني توکي له کابل څخه هند ته د شلو ورځو په موده کې ورسوي.
د وچې مېوې د صادرونکو اتحادیې رییس عبدالقاسم امرخېل وايي: « دا ډېره ښه لاره ده او زموږ صادرات له همدې لارې په غوره توګه روان دي. تقریبا ً له ۲۰ ورځو تر ۱ میاشتې پورې زموږ توکي هندوستان ته رسېږي. حتا زموږ څو موټره مال په ۱۷ ورځو کې هم هندوستان رسېدلي. همدا اوس ۱۵۰ کانټینره مال په لارو دی چې ښايي راتلونکو دوو اونیو کې ۲۰۰ کانټینرونو ته ورسېږي. د چابهار له لارې صادرات یو ښه فرصت دی او موږ ټولو سوداګرو ته خبر ورکوو چې په دې لاره هېڅ ډول ستونزه نه شته او بانکي اړتیاوې هم پوره کېږي.»
د صنعت او سوداګرۍ وزارت د چارواکو په خبره، افغانستان د ګاونډیانو په شمول له ټولو هېوادونو سره د ښو اقتصادي اړیکو د پراختیا غوښتونکی دی او له دې لارې هڅه کوي چې په ځانګړې توګه له پاکستان سره د سوداګريزو مسيرونو په تړل کېدو سره، کورني بازارونه له اغېزمنتيا خوندي وساتي.
