افغانستان له روسیې سره د دوه میلیونه ټنه تېلو، نیم میلیون ټن ګازو او دوه میلیونه ټنه غنمو قرارداد لاسلیک کړی دی.
د افغانستان سوداګرۍ او صنایعو وزارت ویاند عبدالسلام جواد وايي،د دغو توکو په رارسیدو سره به په ټول هېواد کې بیې له ۲۵ تر ۵۰ سلنې راکمې شي.
جواد زیاته کړه:« د بارګیرۍ چارې یې پیل شوي او په نږدو ورځو کې به افغانستان ته را وارد شي او پر بیو به مثبت تاثیرات ولري.هېله لرو،چې له دې سره به بیې له ۲۵ تر ۵۰ سلنې راکمې شي.»
مسولین او اقتصاد پوهان له روسیې سره قراداد ته هېله من دي،چې په بازار به مثبت اغیز ولري، خو موټر چلوونکي شکایت لري،چې په بازارونو کې د نفتو بیه لوړه ده او وېره لري،که تازه قرار داد شوي نفت هم راورسیږي،نو د ځینو کړیو له لوري به احتکار شي او پر بازار به هېڅ اغیز ونه لري.
کابل کې یو تن موټر چلوونکی ګل اغا نور زاده وايي:« د تیلو قرار داد شوی دی،خو په بازارونو کې نه دي ارزانه شوي. اسلامي امارت یې باید مخه ونیسي،موږ نه پوهیږو،چې سوداګر احتکار کوي که څه کوي. خو قیمتونه یې یوازې یوه یا دوه افغانۍ ارزانه شوي.»
په ورته وخت کې د سوداګرۍ او صنایعو وزارت ویاند عبدالسلام جواد بیا ډاډ ورکوي،چې دا ځل جدي دي،هېچاته به د احتکار اجازه ورنه کړي او پر وینا یې بازار یې له انحصاره اېستلی دی.
د جواد په خبره، پلان دا دی،چې له روسیې د نفتو په رارسیدو سره به یې د هېواد ټولو سیمو ته ورسوي او د هرډول احتکار او خپلسریو مخه به ونیسي.
هغه زیاته کړه:« ملت ته ډاډ ورکوو،چې دا حتکار مسله به نوره هېڅ نه وي،ځکه چې اسلامي امارت پرې کنټرول لري، د خصوصي سکتور په همکارۍ به یې ټولو ولایتونو او ولسوالیو ته عرضه کړو او وبه رسول شي.»
شااوخوا یوه اوونۍ وړاندې افغانستان له روسیې سره د یوه کال لپاره د دوه اعشاریه پنځه میلیونه ټنو نفتو او مایع ګازو او د دوه میلیونو ټنه غنمو قرار داد لاسلیک کړ،چې دا مهال یې د لومړۍ جوپې توکي بارګیري کیږي او تر راتلونکو څو ورځو به هېواد ته راورسیږي.
