هرات کې د ریاست الوزرا اداري مرستیال عبدالسلام حنفي له خوا صنعتکارانو ته د صنعتي ښارګوټي څلورم فاز د ځمکو اسنادو وېش پيل او د پنځم فاز د بنسټ ډبره کېښودل شوه.
په دې مناسبت جوړه شوې غوڼده کې مسوولینو ټینګار کړی چې هېواد کې د پانګونې لپاره زمینه برابره شوې او هڅه کېږي چې افغانستان له وارداتي پر صادراتي هېواد بدل شي.
د ریاست الوزرا اداري مرستیال عبدالسلام حنفي وايي: « د افغانستان اسلامي امارت تل دا ویلي چې د صنعتکارانو، سوداګرو او هر څوک چې افغانستان کې پانګونه کوي، ملاتړ کوي او هڅه کېږي چې چارې یې ورته اسانه کړو.»
د صنعت او سوداګرۍ وزارت د صنعت او سوداګرۍ معین احمدالله زاهد وايي: « د اسلامي امارت رهبري داسې اقتصادي خپلواکۍ ته ژمنه ده لکه څنګه چې نظامي او سیاسي برخو کې خپلواک دی. ورځ په ورځ هغه ورځې ته نږدې کیږو چې افغانستان د وارداتي هېواد یو تولیدي او صنعتي هېواد ته بدل کړو.»
د مسوولینو په خبره، د هرات صنعتي ښارګوټي څلورم فاز کې به ۶۰۰ جریبه ځمکه او پنځم فاز کې ۶۰۸ جریبه ځمکه صنعتکارانو ته ووېشل شي او دواړه فازونو کې به له ۴۰۰ تر ۴۵۰ کارخونې جوړي شي.
د هرات صنعت او سوداګرۍ رییس بشیر محمد سیرت وايي: « د څلورم فاز مجموعي مساحت ۶۰۰ جریبه او د پنځم فاز مجموعي مساحت ۶۰۸ جریبه دی.»
بله خوا، پانګوال د ځمکو وېش د پانګونې جذب او پراختیا او خلګو ته د کار موندنې برخه کې مهم بولي خو ټینګار کوي چې د برېښنا ستونزه دې هم حل شي.
صنعتکار امید هروي وايي: « صنعتي ښارګوټي باید خاص سهولتونه ولري، لکه برېښنا چې متأسفانه موږ د برېښنا کمښت سره مخ یو، ځکه موږ تېرو کلونو کې خپله داخلي برېښنا نه درلوده.»
صنعتکار عزیزالله نورزی وايي: « کله چې ځمکه زموږ په اختیار کې راکول کیږي، موږ کوشش کوو چې ژر تعمیر او کارخونه جوړه کړو. زموږ شرکت کې به ۱۵۰ تر ۲۰۰ کسانو ته د کار زمینه برابره شي.»
دا په داسي حال کې ده چې اوس مهال د هرات په صنعتي ښارګوټي کې څه باندي ۱۱۶۰ کارخونې فعالې دي چې د مسوولینو د مالوماتو له مخې، په کي له ۸۰ زرو ډېر کسان پر کار بوخت دي.
