د کانونو او پټرولیم وزارت د کندهار ولایت د دره نور د مرمر ډبرو کان د کېندنې تړون د امي اوغلو په نوم له یوه ترکي شرکت سره لاسلیک کړ.
دغه تړون د ۱۰ کلونو لپاره د ۶.۲ میلیونو ډالرو په ارزښت لاسلیک شو چې یاد شرکت به یې د اکتشاف، استخراج او پروسېس په برخو کې پانګونه کوي.
د کانونو او پټرولیم وزارات سرپرست هدایت الله بدري وايي، له دې سره به سلګونه خلکو ته د کار زمینه هم برابره شي.
بدري زیاتوي: « یاد شرکت به د اکتشاف، استخراج او پروسېس په برخه کې ۶.۲ میلیونه امریکايي ډالره پانګونه وکړي. دغه راز به د کړو ژمنو پر بنسټ خپلې چارې له نړیوالو معیارونو سره سمې ترسره کوي. د دې تړون په لاسلیک سره به د هېواد سلګونه ځوانانو ته کاري فرصتونه برابر شي.»
د ترکي شرکت مسوولین بیا وايي، هڅه کوي د افغانستان د مرمر ډبرې نړیوالو سوداګریزو بازارونو ته معرفي کړي او له دې لارې ورته پیرېدونکي ومومي.
د ترکي قراردادي شرکت مرستیال موسی اوغلو وايي: « زموږ ژمنه دا ده چې غواړو د افغانستان د مرمر ډبرې له تولید او پروسېس وروسته پر نړیواله کچه په سوداګریزه بڼه معرفي کړو، ترڅو په راتلونکي کې خپل ځانګړي پېرودونکي ولري.»
د کندهار ولایت د دره نور د مرمر ډبرو کان د لوی مقیاس له کانونو دی چې یاد ترکي شرکت به د۱۰ کلونو په موده کې د دې کان مرمر ډبرې استخراج او پروسېس کړي.
افغانستان د کاني زېرمو له پلوه غني هېواد دی خو د لسیزو جګړو له افغانانو دا فرصت اخیستی چې د خپل هېواد زېرمې راوسپړي او ګټه ترې واخلي.
