د هند، ایران او ازبېکستان چارواکو او د افغانستان د سوداګرۍ او پانګونې خونې یوه پلاوي د افغانستان د بیارغونې او اقتصادي پراختیا په برخه کې د چابهار بندر پر اهمیت او همدارنګه منځنۍ آسیا ته د بدیل سوداګریز دهلېز په توګه د یاد بندر پر چمتووالي خبرې کړې.
دغه ناسته په نوي ډهلي کې ترسره شوې او ګډونوالو يې د چابهار بندر له لارې د ټرانزيټ پر زیاتېدو او په اقتصادي برخه کې د افغانستان لپاره پر سیمه يیز اتصال او د چابهار بندر له لارې د توکو د ټرانزیټ پر اسانتیا هم بحث کړی.
په هند کې د ایران سفارت ویلي:« په دې ناسته کې د افغانستان په پرمختګ او بیارغونه کې د چابهار پر اهمیت او مرکزي آسیا ته د یوې بدیلې لارې په توګه د دې بندر د برابرولو، د ټرانزېټ په برخه کې پر سیمه يیز اتصال او د اړینو اسانتیاوو پر رامنځته کولو ټینګار وشو.»
د سوداګرۍ او پانګونې خونې مسوولین په دې اړه څه نه وايي، خو د اقتصادي چارو کارپوهان وايي، د دې بندر له لارې د سوداګرۍ پراختیا کولی شي په افغانستان کې اقتصادي ثبات تامین کړي او سیمه يیز اتصال ته لاره هواره کړي.
د اقتصادي چارو شنوونکی محمد یونس ځدراڼ وايي: « د چابهار بندر د افغانستان اقتصادي پرمختګ، سیمه ییزې همکارۍ او ستراتیژیک استقلال لپاره حیاتي ارزښت لري. په مؤثره توګه د دې بندر کارول کولی شي افغانستان د اقتصادي ودې او سیمې پر کچه د تجارت په مرکز بدل کړي.»
سوداګر محمد نبي افغان وايي: « د چابهار له لارې تجارت کول شي زموږ توکي د سوېلي آسیا هېوادونو هندوستان، سریلانکا او بنګله دېش ته ورسوي. دا هېوادونه ډېر لوی نفوس لري. که موږ وکولی شو د خپلو تجارتي توکو لپاره دا لاره پرانیزو، ډېره ګټه به وکړو.»
ځینې نور بیا وايي، له پاکستان سره د ټرانزیټ په برخه کې د دوامداره ستونزو حل لپاره چابهار یوه مهمه او ستراتیژیکه لار ده چې په خبره يې کولی شي تر ډېره د توکو په لېږد کې د افغان سوداګرو ستونزې حل کړي.
د اقتصادي چارو کارپوه عبدالنصیر رشتیا په دې اړه وايي: « هندوستان ډېره هڅه کوي چې د چابهار بندر له لارې افغانستان او د افغانستان له لارې منځنۍ آسیا ته لاره پيدا کړي. همدارنګه ازبېکستان هڅه کوي چې د افغانستان او بیا چابهار له لارې د سوېلي آسیا هېوادونو ته خپل توکي صادر کړي. دغه لار د افغانستان لپاره هم د عوایدو او هم د صادراتو په برخه کې ډېره ګټوره تمامېږي.»
د راپورونو له مخې، د هند، ایران او ازبېکستان چارواکو په سیمه يیز اتصال کې د چابهار بندر له لارې د سوداګرۍ پر تقویت راتلونکي کې د ورته ناستو جوړېدل مهم ګڼلي.
