د ننګرهار ولایت په مرکز جلال آباد ښار کې له څو امنیتي پيښو وروسته په دې ښار کې چیک پاینټونه او ګزمې ډېرې شوي او ترنیمو شپو په کې ډېری هټۍ خلاصې وي.
دشمشاد خبریال شاه آغا سادات چې جلال اباد ښار کې یې ښاریانو سره خبرې کړي او پر چیک پاینټونو ګرځيدلی پولیسو د بشپړ امنیت ډاډ ښودلی او وايي، چاته اجازه نه ورکوي چې امنیت وننګوي.
د جلال آباد ښار یو تن اوسېدونکی فاروق وايي:« امنیت ډېر ښه دی، تاسو ګورئ په ښار کې خلک تر نیمې شپې پورې روان وي. ګڼه ګوڼه په کې شته ده، د امنیت له پلوه هېڅ ستونزه نه شته او موږ ټول ننګرهاریان له طالبانو راضي یو. »
د ښار په یوې بله څنډه کې امنیتي ځواکونه ولاړ دي د خلکو هټۍ خلاصې دي او خلک عادي ژوند کوي.
جلال آباد ښار کې یو تن لاس پلورونکی عبدالرحمان وايي:« ښار کې امنیتي وضعیت ډېر ښه دی، هېڅ ستونزه نه شته.»
جلال اباد ښار چې ځينو برخو کې یې پارکونه جوړ شوي له لیرې ولسوالیو ورته خلک د میلو لپاره راځي، دوی وايي، له امنیت خوښ دي او له مسوولینو غواړي چې شته امنیت دې لا خوندي وساتي.
یو تن سیلاني نعمت الله زابلی وايي:« خلک راځي خو د تېر پرتله ډېر کم. مخکې د خلکو اقتصادي وضعیت ډېر ښه وه، کاروبارونه زیات ول، پروژې وې او د خلکو عاید ښه وه، خو اوس زموږ ۵۰ تر ۶۰ سلنې پورې پېرېدونکي کم شوي دي. هېله لرو چې بېرته به کاروبار ښه شي. مهمه امنیت دی انشاء الله ټول کارونه به ښه شي.»
د دې ښارځینې نور اوسېدونکي بیا وایي،لاهم په ځینو برخو کې وسله والې غلاوې شته او له امنیتي ځواکونو غواړي چې مخنیوی یې وکړي.
ښاریان دغه راز له اسلامي امارت غواړي چې امنیتي ځواکونو باندې یونیفورم وويشي.
امنیتي ځواکونه وایي، امنیتي وضعیت په بشپړډول سره ښه شوی او په خبره یې هیچاته به اجازه ورنه کړي چې د دېښار امنیت زیانمن کړي.
