د ریاست الوزرا اقتصادي مرستیال ملا عبدالغني برادر اخوند پر مشرۍ د ملي تدارکاتو کمېسیون د شاوخوا ۱۰ میلیارده افغانیو په ارزښت د ۱۲ پروژو قراردادونه منظور او د ۱۵ نورو يې تعدیل کړل.
د اسلامي امارت مرستیال ویاند حمد الله فطرت وایي، د دې کمېسیون په نوبتې غونډه کې ۳۰ پروژې د منظورۍ لپاره وړاندې شوې وي چې له ډلې یې د ۱۲ پروژو قراردادونه منظور، د ۱۵ تعدیل، د یوې لغوه او د دوو پروژو قردادونه د قېمتونو بیا کتنې ته سپارل شوي دي.
فطرت په دې اړه وايي: « د ملي تدارکاتو په نوبتي غونډه کې ۳۰ پروژې د منظورۍ لپاره وړاندې شوې وې چې له ډلې یې د ۱۲ پروژو قراردادونه منظور شول. په دغو پروژو کې د کندهار او زابل پوهنتونونو لپاره د شپه غالي د پاتې چارو بشپړول، د کندهار احمدشاهي هوايي ډګر بیا رغونه، د قیصار-لامان د ۲۵ کیلومټره پاتې سړک جوړول، د مزار- حیران رېل پټلۍ د ریلي او غیر ریلي تأسیساتو بیارغونه، په کابل ښار کې د ځېنو سړکونو جوړونه او یو شمېر نورې پروژې شاملې دي. دغه ټولې پروژې به د اسلامي امارت له بودیجې څخه تمویل شي.»
د چارواکو په خبره، په منظورو شویو او تعدیل شویو پروژو کې د کندهار، زابل او نیمروز د پوهنتونونو د لیلیو ودانیو پاتې چارو بشپړول، د کندهار احمدشاه بابا نړیوال هوايي ډګر بیارغونه او په بادغیس کې د قیصار–لامان ۲۵کیلومتره حلقوي سړک د پاتې چارو ترسره کول شامل دي.
دغه راز په دې پروژو کې د حیرتان- مزارشریف اوسپنې پټلۍ د ریلي او غیر ریلي تاسیساتو بیارغونه، د کابل ښار ځینې داخلي سړکونو رغول او یو شمېر نورې پروژې شاملې دي چې ټول لګښت يې له ملي بوديجې ورکول کېږي.
د اقتصادي چارو شنونکی شهسوار سنګروال وايي: « په دې سره به هغه ځوانان په کارونو بوخت شي چې بهر ته د کار لپاره ځي، له ګاونډیو هېوادونو څخه راستنېدونکو کډوالو ته به د کار زمینه برابره شي.»
د اقتصادي چارو شنونکي د دغو پروژو تطبیق مهم بولي او له اسلامي امارت غواړي چې له اوسني امنیت په ګټه اخیستنې سره دې په ټولو ولایتونو کې زيربنايي پروژې پلې او خلکو ته د کار زمینه برابره کړي.
د اقتصادي چارو کارپوه جنت فهیم چکري وايي: « دا ډول پروژې د اقتصادي وضعیت ښه کېدو او دغه راز د ځوانانو لپاره د کار زمینې چمتو کېدو لپاره ډېرې اړینې او ګټورې دي. هیله ده اسلامي امارت اقتصادي پروژې لا ډېرې کړي.»
دا په داسې حال کې ده، چې د اسلامي امارت له بیا ځلې واکمنېدو وروسته یو شمېر لويو او کوچنیو پراختیایي پروژو کارونه پيل شوي او سرپرست حکومت ډاډ ورکوي چې په ټولو ولایتونو کې به یو شان پروژې پلې کړي.
