د بښنې نړیوال سازمان د پاکستان له حکومت غوښتي چې د دې هېواد پخواني لومړي وزیر عمران خان او مېرمنې ته یې د کورنیو له غړیو او وکیلانو سره د لیدنې او روغتیايي خدمتونو ته د لاس رسي لپاره اسانتیاوې برابرې کړي.
دې سازمان په بند کې د عمران درې کاله بشپړېدو ته په اشارې ویلي، د پاکستان حکومت عمران او مېرمن یې له عادلانه محکمې، مناسبې روغتیايي پاملرنې او د کورنۍ د غړیو له لیدنې بې برخه کړي او هم یې په انفرادي بندخونه کې ساتلي دي.
یاد سازمان دغه راز له پاکستاني چارواکو غوښتي چې د عمران خان د پلویانو د سوله ییزو لارویونونو مخه ډپ نه کړي او د لاریون کوونکو پر وړاندې له زورزیاتي او خپل سرو اقداماتو لاس په سر شي.
د سوېلي اسیا لپاره د بښنې نړیوال سازمان سرپرسته ایزابېل لاسي وايي: « د بښنې نړیوال سازمان له پاکستاني چارواکو غوښتي چې د عمران خان او بشرا بي بي سره د هغوی د کورنۍ او وکیلانو د ليدنې حق له کوم شرط پرته پوره کړي.»
د پاکستان پخوانی لومړی وزیر عمران خان چې اوسمهال ۷۲ کاله عمر لري، د ۲۰۲۳ زېږدیز کال له اګسټ میاشتې راهیسې د پاکستان حکومت له لوري د فساد په ځينو قضیو کې د ښکېلتیا په تور بندي دی.
د عمران کورنۍ غړیو او د تحریک انصاف ګوند(پيټيای) په کراتو د عمران خان د نیولو قضیه سیاسي پلمې بللي او د دې هېواد د پوځ مشر، عاصم منیر یې تورن کړی چې د خپلو سیاسي موخو لپاره د دې ګوند رهبري ځپي.
پيټيای د عمران خان په بند کې د درې کلونو پوره کېدو سره سم، په پاکستان او خیبرپښتونخوا کې د پراخو لاریونو پیلولو خبر ورکړی او له خپلو پلویانو یې غوښتي چې په دغو سووله ییزو احتجاجونو کې ورسره برخه واخلي.
د عمران خان زوی قسیم خان له سياېناېن ټلویزیون سره په مرکه کې د تحریک انصاف ګوند او نورو سیاسي ګوندونو د سووله ییز لاریونونو پر وړاندې د پاکستان حکومت پالیسي د تاوتریخوالي او ډېکتاتورۍ پر اصولو متمرکزه بللې.
نوموړي ویلي، پاکستان د یوه پوځي ډېکتاتور تر سیورۍ لاندې دی چې لاریون کوونکي په کې په ناوړه چلن سره ځپل کېږي.
د عمران خان زوی ویلي: « حکومت تل د هر ډول لاریونونو پر وړاندې ناوړه چلن غوره کړی او دا هر څه په وروستیو څو کلونو کې پېښ شوي. دا یوه پوځي ډېکتاتوري ده، دوی لاریون کوونکي په ناوړه چلن سره ځپي.»
د راپورونو له مخې، د پاکستان پخواني لومړي وزیر عمران خان پر وړاندې د توشه خانې څخه غلا، د ځمکې او پیسو د فساد تورونه او د پوځي چارواکو پر وړاندې د سیاسي مخالفت سخت دریځ نیونه، په بند کې د پاتې کېدو اساسي لاملونه دي.
