د امریکا په کانګرېس کې قانون جوړونکو استازو جو وېلسن او جیمي پانیتا هغه مسوده چمتو کړې چې په کې د پاکستان د پوځ لوی درستیز عاصم منیر د بشري حقونو پر نقض تورن شوی دی.
په دې مسوده کې د امریکا ولسمشر ډونالډ ټرمپ ته وړاندیز شوی، که پاکستان د بشري حقونو وضعیت ته جدي پام ونه کړي، تر۱۸۰ ورځو یا شپږ میاشتو دې د پاکستان د پوځ لوی درستیز عاصم منیر هم د نړیوالو سفرونو د بندیر په لېست کې شامل شي.
دغه لایحه چې «د پاکستان ډيموکراسۍ عمل» په نوم د مسودې په توګه ترتیب شوې، د کتنې او بحث لپاره د کانګرېس بهرنیو چارو او قضا کمېټې ته استول شوې ده.
د امريکا د کانګرېس غړي جو وېلسن ویلي: « خوښ یم چې د پاکستان ډیموکراسۍ د عمل مسوده معرفي کوم. د دې مسودې له مخې به پر هغو کسانو بندیز ولګول شي چې په پاکستان کې د ډیموکراسۍ د کمزوري کولو هڅه کوي.»
د ۲۰۲۴ زېږدیز کال په جون میاشت کې د امریکا په کانګرېس کې ورته یوه پرېکړه وړاندې شوه چې په کې د امریکا له پخواني ولسمشر جوبایډن وغوښتل شول ترڅو د بشري حقونو د رعایت لپاره پر اسلاماباد فشار راوړي.
پاکستاني رسنیو په امریکا کې د پاکستان سفارت د سرچینو له قوله راپور ورکړی چې اسلام اباد به پر عاصم منیر د سفر بندیز د مخنیوي لپاره واشنګټن سره خبرې وکړي.
سرچینې زیاته کړې، له زندان د عمران خان د آزادولو لپاره د تحریک انصاف ګوند پلویانو په امریکا کې د واشنګټن د ملاتړ ترلاسه کولو لپاره جدي هڅې پیل کړې او تر ډېره بریالي شوي هم دي.
خو د سیاسي چارو کارپوهان وايي، د پاکستان پوځ د خپلو اهدافو لپاره نه یوازې تر حاکمیت لاندې سیمو کې بشري حقونو نقض کړي، بلکې د حکومت اپوزیسيون او یو شمېر چارواکي يې هم د نامالومو لاملونو له امله شکنجه کړي دي.
د سیاسي چارو شنونکی عزیز معارج وايي: « د پاکستان د وضعیت خرابېدل دوه دلایل لري، یو یې کورنی دی چې ظلم او ستم، زیاتی او بې عدالتي او د پنجابیانو له خوا له نورو قومونو سره تبعیضي چلن دی چې په سر کې یې نظامیان او آی اېس آی دی. دویم هم د غربي نړۍ هڅې دي چې غواړي په پاکستان کې د چین د پانګونې مخه ونیسي. اوس د دې وضعیت د راټوولو او د غربي نړۍ د اقدام لپاره هسې یوه پلمه جوړوي چې ګوندې دا ټول مشکلات عاصم منیر جوړ کړي او په دې توګه یې غواړي له قدرت لرې کړي، ترڅو حالات کنټرول کړي.»
د سیاسي چارو شنونکی اخترمحمد راسخ وايي: « تاسو ته بهتره مالومه ده چې د پاکستان استخباراتي او نظامي جنرالانو په دې سیمه کې د نا امنیو جوړولو او د خپلو جیبونو او بانکونو ډکولو لپاره، تر مختلفو شعارونو او بیرغونو لاندې ډلې جوړې کړې او د هغوی له لارې یې میلیاردونه ډالر ترلاسه کړل. اوس امریکا د دې پروژې د تړلو لپاره ژمنه کړې او غواړي د پاکستان پر نظامیانو بندیزونه ولګوي.»
د تحریک انصاف ګوند بنسټ اېښودونکی او د پاکستان پخوانی لومړی وزیر عمران خان له توشه خانې د دولتي سوغاتونو په ناقانونه توګه د پلور په قضیه کې بندی شوی چې تېر کال په وروستۍ محکمه کې ورته د ۱۴ کاله بند سزا واورل شوه.
