د صنعت او سوداګرۍ وزارت وایي، په ۱۴۰۳ لمریز کال د افغانستان د غالیو صادرات له ۱۵ میلیونو ډالرو زیات وو.
د دې وزارت د اخندزاده عبدالسلام جواد وايي، تېر کال له ۳ زرو ټنو زیاتې غالۍ استرالیا، جرمني، امریکا، ترکمنستان، ازبېکستان، پاکستان، متحده عربي امارات، سعودي عربستان، هندوستان، کاناډا او یو شمېر نورو هېوادونو ته صادرې شوې دي.
جواد په دې اړه وايي: « د ۱۴۰۳ لمریز کال په لړ کې د افغانستان د غالیو صادرات د ۳ زره ۶۳۲ ټنو په اندازه وو چې پولي ارزښت یې شاخوا ۱۵ میلیونه ۲۰۰ زره امریکايي ډالر کېږي. دغه صادرات پاکستان، اسټرالیا، ایران، ترکیې، ترکمنستان، ازبېکستان، جرمني، هالنډ، د امریکا متحده ایالتونو، هند، کاناډا، عربي متحده اماراتو، سعودي عربستان او یو شمېر نورو هېوادونو ته شوې دي.»
د غالۍ اوبدونکو او صادروونکو ټولنې غړي نورو هېوادونو ته د غالیو پر صادراتو د لګښتونو له لوړېدو شکایت کوي او وايي، بندرونو ته د لاسرسي د نه لرلو له امله دا توکي د ګاونډیو هېوادونو له لارې بهر ته صادرېږي.
هغوی له سرپرست حکومته غواړي چې د غالیو د صادراتو لپاره هوایي دهلېزونه فعال کړي.
د غالۍ اوبدونکو او صادروونکو ټولنې لومړی مرستیال نور احمد نوري وايي:« زموږ ۵۱ سلنه غالۍ د پاکستان له لارې صادرېږي، خو خپله پاکستان کې د دې غالیو یو متر هم نه کارول کېږي، بلکې هلته پروسېس کېږي او بیا صادرېږي. د صادراتو په برخه کې له افغانستانه د غالیو د انتقال لګښت ډېر زیات دی؛ موږ بحري بندرونه نه لرو چې ارزانه پرېوځي. له همدې امله غوښتنه کوو چې د غالیو د صادراتو لپاره سب سایډي ورکړي او که صادرات د هوايي دهلېزونو له لارې ترسره شي، دا به ډېر ښه شي.»
په همدې حال کې، د اقتصادي چارو کارپوهان د غالیو د صادراتو زیاتوالی د کورني اقتصاد د پیاوړتیا لپاره مهم ګڼي او له سرپرست حکومته غواړي چې د غالیو لپاره نړیوال بازارونه پیدا او بدیلې لارې برابرې کړي.
د اقتصادي چارو شنونکی نور الله عزیز وايي: « که حاکم نظام په دې برخه کې د تجارانو، تولیدوونکو او صنعتکارانو سره لازمې مرستې ونه کړي او د دوی لپاره د بازار موندلو په برخه کې سهولتونه ایجاد نه کړي، دغه راز په نړیوالو مارکېټونو کې د دوی لپاره لابي ونه کړي او ترڅنګ یې د دې صنعت د ژوندي ساتلو لپاره لازمې سب سایډي ګانې او په پانګونه کې لازم فرصتونه برابر نه کړي، زه فکر کوم دا صنعت به په راتلونکي کې له ډېرو ستونزو سره مخ شي.»
غالۍ اوبدل د افغانستان لرغونی او با ارزښته صنعت ګڼل کېږي چې د هېواد په شمالي ولایتونو کې ډېری خلک په کې پر کار بوخت دي.
د صنعت او سوداګرۍ وزارت د مالوماتو له مخې، په ټول هېواد کې له یو میلیون زیات وګړي د غالۍ اوبدلو په صنعت کې کار کوي.
