د افغانستان د اوسپنې وېلې کولو اتحاديې مسوولان وايي، تېر کال ۲۱۰ زره ټنه اوسپنه ترکمنستان او پاکستان ته صادره شوې ده.
مسوولینو په همدې تړاو، خوست کې د اوسپنې وېلې کولو د یوې نوې نمايندګۍ پرانستغونډې ته د خبرو پرمهال زیاته کړه، دا مهال په افغانستان کې د اوسپنې وېلې کولو ۴۵ لويې کارخونې فعالې دي.
د اوسپنې وېلې کولو اتحادیې اجراییوي رییس عبدالنصیر رښتیا وايي: « موږ په افغانستان کې د اوسپنې وېلې کولو ۴۵ فابریکې لرو چې په کې آهن ګاډر، انګلارن او چینل تولیدېږي او په راتلونکي کې پلان لرو چې ورقي آهن او آهن څادر هم تولید کړو. د اوسپنې وېلې کولو په سکټور کې ۵۰۰ میلیون ډالره پانګونه شوې، ۲۰ زره تنه په کې په مخامخ او له ۵۰ زرو ډېر په غیر مستقیمه توګه په کې په کارونو بوخت دي.»
د نوموړي په خبره، د اوسپنې وېلې کولو په دې کارخونو کې بېلابېل اوسپنيز توکي توليديږي. د ده په خبره، تېر کال۱۵۰ زره ټنه اوسپنه ترکمنستان او ۶۰ زره ټنه پاکستان ته صادره شوه. ریښتیا وړاندې وویل، دا مهال افغانستان د اوسپنې له پلوه پرځان بسيا دی او په دې برخه کې د وارداتو کچه صفر ته رسېدلې ده.
عبدالنصیر رښتیا په دې اړه وايي: « زموږ تولیدات له نړیوالو معیارونو سره سمون لري. ګاونډي هېوادونه له موږ سره د کیفیت او معیار په لحاظ رقابت نه شي کولی، اوس زموږ یوازینی سیال د روسیې هېواد دی. افغانستان دا مهال د اوسپنې په برخه کې مطلق ځان بسیا دی او عملا ً ترکمنستان ته صادرات هم لرو.»
د خوست اوسېدونکي بيا په هېواد کې د اوسپنې وېلې کولو په شمول د توليدي فابریکو زياتوالي ته له دې امله خوښ دي چې ګڼو بې روزګاره ځوانانو ته به په کې د کار کولو فرصتونه برابر شي.
د خوست یو تن اوسېدونکی عارف شاه وايي: « انشاالله د دې نمایندګۍ په پرانستنې سره به د خوست په ښکلا، پراختیا او بیا رغونه کې برخه واخیستل شي او خلکو ته به مستقیم او غیر مستقیم کارونه برابر شي.»
د مسوولانو د معلوماتو له مخې، تمه کېږي په نږدې راتلونکي کې د اوسپنې وېلې کولو په يادو کارخونو کې د اورګاډي پټلۍ او آهن څار هم توليد شي.
