د سرپرست حکومت له خوا تر دې دمه څو فرمانونه د بهرنيو اسعارو د کارونې ممنوعیت په اړه صادر شوي.
په نوامبر میاشت کې هم یو بل رسمي فرمان صادر شو چې په کې د معاملاتو پرمهال د بهرنيو اسعارو پر نه کارولو او په ټولو معاملاتو کې د افغانيو پر استعمال ټینګار شوی.
سرپرست حکومت له څو میاشتو راهیسې د دې فرمان د جدي پلي کېدو لپاره کمپاین هم پیل کړی.
اوس د افغانستان بانک مسوولین وایي، په دې بریالي شوي چې افغانۍ هغو سیمو ته ورسوي چې پخوا يې ځای بهرنيو اسعارو نيولی و.
د افغانستان بانک ویاند حسیب الله نوري وايي: « د افغانستان بانک د هېواد د مرکزي بانک په توګه توانېدلی چې په هغو سیمو کې چې له دې وړاندې په کې سیمه ییز اسعار کارېدل، هلته افغانۍ ترویج کړي. افغانۍ اوس د سیمې هېوادونو پر کچه د غوره ثبات لرونکې کرنسۍ په لړ کې ځای لري او په کار ده چې زموږ درانه هېوادوال یې په خپلو راکړه ورکړو کې وکاروي.»
د کندهار او ننګرهار ولایتونو اوسېدونکي وایي، اوس مهال خلک په خپلو معاملاتو کې د بهرنیو اسعارو او په ځانګړي ډول پاکستانۍ روپۍ (کلدارې) نه کاروي او دا کار منع شوی دی.
د کندهار اوسېدونکی ګلالی وايي: « پخوا کلدارې وې، خو اوس په مطلق ډول بندې شوې دي او خاص له افغانیو کار اخیستل کېږي. موږ له خلکو غوښتنه کوو چې کلدارې بندې کړي او په افغانیو راکړه ورکړه وکړي.»
د ننګرهار اوسېدونکی عطاءالله وايي:« د کلدارو کارول خو اوس مطلق بند دي او سودا په افغانیو کېږي. دا ډېر ښه کار وشو، ځکه افغانۍ زموږ خپله پیسه ده او کلدارې باید ونه چلېږي. حکومت هم له دې کار بد وړي او په افغانیو د راکړه ورکړې امر کوي.»
له بلې خوا، د اقتصادي چارو کارپوهان وایي، د بهرنیو اسعارو کارونه د هېواد اقتصاد ته زیان اړوي، د بیو لوړېدو لامل کېږي او د افغانیو ارزښت بې ثباته کوي.
اقتصادي کارپوه عبدالجبار ساپی وايي: « په یوه هېواد کې د بل هېواد د کرنسیو کارېدل د دې هېواد پر خپلو اسعارو منفي اغېز کوي. لکه څرنګه چې اسلامي امارت په ټولو ولایتونو کې اعلان کړی چې معاملات په افغانیو ترسره او د کلدارو، تومانونو په ګډون د نورو هېوادونو له اسعارو کارولو ډډه وشي، دا کار د افغانستان د خپلې کرنسۍ او اقتصادي ثبات لپاره مثبت اغېز لري. کله چې د بهرنیو اسعارو د کارولو مخه نیول کېږي، افغانۍ ثبات پيدا کوي او قېمتونه ورسره ښکته کېږي.»
په یو شمېر ولایتونو او په ځانګړي ډول ایران او پاکستان ته نږدې سيمو کې، د ډالرو، پاکستاني روپیو او ایراني تومانونو کارونه د ورځنیو معاملو لپاره معمول و.
دا بهیر چې له پخوا تر اوسه پورې روان و، کله ناکله د اسعارو د نرخونو د بدلون او د افغانیو د ارزښت ټیټېدو سبب شوی.
خو تازه، سرپرست حکومت د بهرنیو اسعارو پر انتقال او پرې د معاملاتو ترسره کولو باندې محدودیتونه لګولي، ترڅو د بهرنیو اسعارو پر کارونې تکیه راکمه او د افغانیو ثبات وساتل شي.
