هند وایي له افغانستان سره یې د هوایي دهلېز له لارې سوداګري په ښه حالت او عادي ډول روانه ده.
د دې هېواد بهرنیو چارو وزارت چارواکو نوي ډهلي ته د کرنې وزیر له سفر وروسته ویلي چې د کابل او ډهلي ترمنځ سوداګري د هوايي دهلېز له لارې روانه ده.
د هند بهرنیو چارو وزارت ویاند دغه راز ویلي، د اسلامي امارت د کرنې وزیر هند ته د سفر پر مهال د دې هېواد له وزیرانو او سوداګریزو خونو سره د سوداګرۍ په تړاو لیدنې کړې دي.
رندهیر جېسوال زیاته کړې: « د افغانستان اسلامي امارت کرنې او اوبو لګولو وزیر عطاالله عمري نږدې یوه اوونۍ په هند کې و او دلته یې له بېلابېلو لوړو پوړو چارواکو او لورو سره ښې لېدنې او خبرې لرلې. تاسې خبر یاست چې د ډهلي او کابل ترمنځ هوايي دهلېز فعال دی او د یاد دهلېز له لارې د هند او افغانستان ترمنځ د سوداګریزو توکو راکړه ورکړه په عادي ډول جریان لري.»
د هند بهرنیو چارو وزارت ویاند دا هم ویلي چې د کرنې او اوبو لګولو وزیر عطاالله عمري نږدې یوه اوونۍ په هند کې و او په یاده موده کې یې د هند د کرنې وزیر، د خوراکي توکو د پروسېس له وزیر او د بهرنیو چارو وزارت د مرستیال ترڅنګ، د هند د سوداګرۍ او صنایعو فډراسیون، د سوداګرۍ خونې او د کرنې سکټور په برخه کې له یو شمېر کورنیو او نړیوالو سازمانونو سره څو اړخیزې سوداګریزې ناستې وکړې.
افغان سوداګر هم مني چې په دې وروستیو کې یې له هند سره سوداګري په عادي او ښه ډول روانه ده.
افغان سوداګر عبدالجبار ساپی وايي: « له هغې ورځې راهیسې چې د اسلامي امارت د ریاست الوزرا اقتصادي معاونیت د هوايي دهلېز له لارې د وارداتو او صادراتو فیس یو ډالر وټاکه، له دې سره زموږ او د هند ترمنځ د سوداګرۍ کچه لوړه شوه او اوس په نورمال ډول د افغانستان په ګټه روانه ده.»
افغان سوداګر نبي افغان وايي: « زموږ او هند ترمنځ تجارتي اړیکې لا ښې کېدلی شي. تاسو وګورئ موږ درملو ته اړتیا لرو او له دې خوا هند زموږ وچې او تازه مېوې ته اړتیا لري. همدارنګه زموږ قېمتي کاڼي او نباتي بوټي هم په هند کې ښه بازار لري.»
هندي چارواکو دا څرګندونې داسې مهال کړې چې د افغانستان او پاکستان ترمنځ د روان کړکېچ له پیل راهیسې د کابل او ډهلي ترمنځ د ځمکې له لارې سوداګري یو څه ټکنۍ شوه، خو اوس د دواړو هېوادونو ترمنځ د هوايي دهلېز له لارې دا سوداګرۍ په عادي ډول روانه ده.
