د ترکمنستان حکومت د نفت او ګازو په غونډه کې د ټاپي ګازو نل لیکې د پرمختګ اروزنه شوې او د پروژې د چټکتیا پر اړتیا یې ټینګار کړی.
د دې هېواد دولتي شرکت «ترکمن نفت» د خبرپاڼې په خپرولو سره ویلي، په دې غونډه کې د سرحد اباد – هرات ترمنځ د نل لیکې غځولو د اصلي برخې جوړېدو بهیر څېړل شوی او ټينګار شوی چې چارې یې باید د نړیوالو معیارونو له مخې تعقیب شي.
د یاد شرکت په خبرپاڼه کې زیاته شوې: « ځانګړې پاملرنه د ترکمنستان –افغانستان –پاکستان –هند د ګاز نل لیکې اصلي برخې ته شوې. دا برخه د ترکمنستان له سرحداباد څخه د افغانستان تر هرات پورې غځېږي.»
په خبرپاڼه کې دغه راز راغلي، ټاپي د ګازو نل لیکه شاوخوا۱۸۰۰ کیلومټره اوږدوالی لري چې هر کال ۳۳ میلیارد مترمکعبه طبعي ګاز د ترکمنستان له لارې افغانستان، پاکستان او هند ته انتقالوي.
د اقتصادي چارو شنونکي د ټاپي پروژه د افغانستان اقتصادي ثبات ته حیاتي بولي او له حکومت غواړي چې د دې پروژې پر ژر بشپړېدو کې کوټلي ګامونه واخلي.
د اقتصادي چارو شنونکی محمد عیسی مبارز وايي: « که دا ډول پروژې په چټکۍ سره عملي شي او پانګه اچوونکي هېوادونه او ادارې دېته په پام کې نیولې بودیجه په ټاکلي وخت تأمین کړي، هم د افغانستان په ګټه ده او هم د هغو هېوادونو چې اړتیا ورته لري.»
افغانستان کې د ټاپي ګازو نل لیکې ټول اوږدوالی څه باندې ۸۱۶ کیلومټره اټکل شوی چې رغنیزې چارې یې شاوخوا ۶۰ سلنه بشپړې شوې او د پاتې چارو کارونه یې په چټکۍ سره روان دي.
