د تخار په نمک اب ولسولۍ کې د خصوصي سکټور نوی ګام. پانګوال وایي که ملاتړ یې وشي، خلکو ته د کاري زمینې برابرېدو ترڅنګ به خپل کار ته نوره هم پراختیا ورکړي.
د کارخونې مسوول حاجي محمد نبي وايي: « شاوخوا ۳۰ میلیونه ډالر موږ لګښت پرې کړی، خو لایې هم کارونه پاتې دي. موږ په دې کارخونه کې په دوو پړاوو کې مالګه تصفیه کوو؛ لومړی پړاو یې ابتدايي وینځل دي او بل پړاو یې بیاځل تبلور دی چې په هر ساعت کې به له ۷ تر ۱۰ ټنو مالګې د تصفیه کولو وړتیا ولري.»
دلته پرکار بوخت ځوانان دا ډول پانګونې مهمې بولي او په خبره يې، په کور دننه بوختیا له اقتصادي ودې سره مرسته کوي.
د کارخونې کارګر روزي وايي: « له دې وړاندې ایران کې وم او ډېر به تکلفیف وم. اوس دلته د کار زمینه برابره شوې او ډېر خوښ یم.»
یوبل کارګر محمد هاشم وايي: « زه له ټولو پانګوالو غواړم چې د همدې کارخونې په څېر خپلو خلکو ته د کار زمینه برابره کړي.»
په همدې حال کې د تخار صنعت او سوداګرۍ ریاست مسوولین د ورته پرمختګونو هرکلی کوي او ډاډ ورکوي چې پانګوالو او سوداګرو ته به لا زیات سهولتونه برابر کړي.
د تخار صنعت او سوداګرۍ رییس عبدالرحمن غزنوي وايي: « د اسلامي امارت په راتګ سره امنیت ټینګ دی او خلک کولی شي خپلې سرمایې په ډاډمنه توګه ولګوي. موږ د ټولو ملاتړ کوو او له هغو پانګوالو هم هېواد ته د راتګ غوښتنه کوو چې له هېواد څخه بهر اوسېږي. موږ د دې ملاتړ او امنیت ته ژمن یو.»
د تخار صنعت او سوداګرۍ ریاست د معلوماتو له مخې، په دې ولایت کې شاوخوا ۲۰۰ لویې او کوچنۍ بېلابېلې تولیدي کارخونې فعالیت کوي چې په کې سلګونه کسانو ته کاري فرصت برابر شوی.
