د بلخ ولایت په مرکز مزار شریف ښار کې د مزار هوټل لوی سوداګریز مرکز په نوم د هېواد پر کچه د اوړو او غنمو د کاروبار لوی بازار پرانیستل شو.
د پرانيستې په مراسمو کې محلي چارواکو وویل، د دې بازار له فعالیت سره به سوداګرو ته د اوړو او غنمو په پېر او پلور کې اسانتیاوې رامنځته شي او دغه راز به په بازارونو کې ورسره د احتکار مخه هم ونیول شي.
د مزار هوټل سوداګریز مرکز مسوول مصطفی مومند وايي: « دغه بازار زموږ ولس ته ډېره ګټه لري، په دې کې د اوړو او غنمو کیفیت، نرخونه او مشخص ځای ټاکل کېږي. له دې وړاندې سوداګرو هرځای په پرچون ډول د اوړو او غنمو کاروبار کاوه. اوس د ټولو لپاره یو مشخص آدرس وجود لري او هرڅوک کولی شي دلته پېر او پلور ورکړي.»
په ورته مهال، د افغانستان د اوړو او غنمو د کاروباريانو ټولنې مسوولین د صنعتي ودې لپاره د دې بازار پرانیستنه مهمه ګڼي او زیاتوي چې د دې سوداګریز مرکز له لارې به په بازارونو کې د احتکار مخنیوی هم وشي.
د افغانستان اوړو او غنمو کاروباريانو ټولنې استازی محمد یاسین وهاب زاده وايي: « دغه ګام به د سیمې په اقتصادي وده کې د پام وړ رول ولري. همدارنګه د دې بازار پرانیستل د بلخ د نورو سوداګرو او پانګوالو لپاره د هڅونې یوه بېلګه ګڼل کېږي.»
همدارنګه یو شمېر سوداګر د یاد بازار پرانیستنه د کاروبار په برخه کې ښه ګام بولي او له سوداګرو د حکومت پر ملاتړ د ټينګار ترڅنګ غوښتنه کوي چې پانګوال دې په کور دننه پانګونې ته لومړيتوب ورکړي.
سوداګر حاجي محمد افضل وايي: « دا بازار به ډېر رقابت جوړ کړي او د غنمو په نرخ کې به کموالی راولي. دا بازار زموږ سوداګرو، هېوادوالو او کروندګرو ته ډېر سهولت دی. موږ په نورو کسانو هم غږ کوو چې ورته ګامونه پورته کړي.»
سوداګر ذبیح الله وايي: « دا بازار به د غلې په نرخونو ډېر اغېز ولري. له دې وروسته به په دې بازار کې د غنمو د نرخ له بولۍ په ټولو شمالي ولایتونو کې د غنمو نرخ ټاکل کېږي.»
له بلې خوا، د بلخ ولایتي چارواکي سوداګرو ته د نورو اسانتیاوو برابرولو لپاره د خپلو هڅو د دوام ډاډ ورکوي او زیاتوي، د نوي بازار پرانیستل د سوداګرو لپاره ښه زيری دی.
د بلخ مرستیال والي نورالهادي ابو ادریس وايي: « زموږ ملي سوداګر چې د نړۍ په هرځای کې وي، را دې شي او دلته دې پانګونه وکړي او دا ډول ځایونه دې جوړ کړي. هرڅومره چې ستندرد او معیاري ځایونه ډېر جوړ شي، لاهم کفایت نه کوي او باید زیات شي.»
د بلخ صنعت او سوداګرۍ رئیس امیر محمد متقي وايي: « تاسو ته بهتر مالومه ده چې د اسلامي امارت مسوولین او په ځانګړې توګه د صنعت او تجارت وزارت هڅه کوي چې څنګه کولی شي خپل تجارت په خارجي سطحه او داخلي کچه شفافیت ته ورسوي.»
ټاکل شوې مزار هوټل لوی سوداګریز مرکز کې د اسعارو د تبادلې او نفتي توکو بازارونه هم په نږدې راتلونکي کې پرانیستل شي.
