د ایران د جنوبي خراسان ولایت د اقتصادي او مالي چارو رییس وایي، له افغانستان او چین سره د ازادې سوداګریزې او صنعتي سیمې د جوړولو طرحې اداري بهیر روان دی.
د ایران دولتي رسنۍ(ایرنا) لیکلي چې مرتضی ذاکریان دغه څرګندونې د چین له اقتصادي پلاوي سره په کتنه کې کړې.
نوموړي زیاته کړې، دا څه د درې واړو هېوادونو جغرافیایي، اقتصادي او ټرانزیټي ظرفیتونو ته په کتو ځانګړی ارزښت هم لري.
د ایران خراسان ولایت د اقتصادي او مالي چارو رییس مرتضی ذاکریان ویلي: « د نړیوالو سیاسي تحولاتو په رڼا کې باید ووایم چې د ایران، افغانستان او چین ګډه لار کولی شي د اقتصادي اړیکو پراختیا لپاره د یوې خوندي، بدیلې او دوامدارې لارې په توګه کار کړی او باید دا څه تر پام لاندې ونیول شي. د افغانستان، ایران او چین ترمنځ د سوداګریزې او صنعتي سیمې جوړولو طرحې بهیر د درې واړو هېوادونو جغرافیایي، اقتصادي او ټرانزیټي ظرفیتونو ته په کتو خورا ډېر ارزښت هم لري.»
د ایران د جنوبي خراسان ولایت د اقتصادي او مالي چارو رییس دغه راز ویلي چې د دې نوښت موخه د خصوصي سکټور، په ځانګړي ډول د چینایي پانګوالو په مرسته د سیمهییزو اقتصادي همکاریو پیاوړتیا ده.
د نوموړي په خبره، ایران کولی شي د دې پروژې لپاره اړین بنسټیز امکانات، کاري ځواک او صنعتي وړتیاوې هم برابرې کړي.
مرتضی ذاکریان په دې اړه ویلي: « موږ باید د اقتصادي او ډېپلوماټیکو تګلارو پر بدلون هم کار وکړو، ځکه چې موږ باید له خطي او یو اړخېزې ډېپلوماسۍ څخه څو اړخېزې او څو پوړیزې ډېپلوماسۍ ته لاړ شوو، ترڅو د هېوادونو د ګډو ظرفیتونو د ګټې اخستنې لپاره زمینه برابره شي.»
مرتضی ذاکریان زیاته کړې چې چین به د پانګونې، مالي تمویل او ټکنالوژۍ د لېږد په برخو کې مهم رول ولوبوي او افغانستان به هم د خپلو پراخو کاني سرچینو، کمیابو فلزاتو او مهم ټرانزیټي موقعیت له امله د دې نوښت یو اساسي لوری وي.
د چارو څارونکي بیا وایي، د افغانستان، ایران او چین ترمنځ د ازادې سوداګریزې او صنعتي سیمې جوړول کولی شي افغان سوداګرو ته هم پراخې زمینې برابرې کړي.
د دوی په خبره، دا څه د افغانستان سوداګرۍ، اقتصاد او صنعتي پراختیا په برخه کې هم بېشمېر بدیلې لارې په واک ورکولی شي.
افغان سوداګر عبدالجبار ساپی وايي: « که دا زون جوړ شي، ویلای شم چې د افغانستان په اقتصاد، تجارت او پانګونې کې به ډېر لوړ باور رامنځته شي. دا به زموږ خلکو ته ډېرې کاري زمینې هم برابرې کړي او موږ کولی شو د سیمې په کچه د یوه تجارتي مرکز په توګه ترې کار واخلو.»
اقتصادي شنونکی یونس ځدراڼ وايي: « دا د افغانستان لپاره د سوداګرۍ او اقتصاد له پلوه مثبت ګام دی او ورسره به ډېرې نورې پروژې هم راشي. همدارنګه د دې زون له امله به بهرني پانګوال هم افغانستان کې پانګونې ته زړه ښه کړي. زموږ خپلو پانګوالو ته هم د تجارت او ټرانزیټ ګڼې اسانتیاوې رامنځته کوي.»
د یادولو ده چې واک ته د اسلامي امارت له رسېدو سره د افغانستان ګاونډ او سیمهییز هېوادونه هڅه کوي چې له بېلابېلو لارو له کابل سره سوداګریزې، اقتصادي او ټرانزیټي اړېکې پراخه او لا باوري کړي.
