د ایران سیستان او بلوچستان ولایت د بندرونو او سمندري چارو د تنظیم رئيس، ایراني رسنیو سره په خبرو کې ویلي، د ایران په سوېل کې پروت د چابهار بندر د افغانستان په ګډون یو شمېر هېوادونو ته تر ټولو ارزانه، چټکه او ګټوره لار ده.
قاسم عسکري نسب زیاته کړې، دغه ستراتیژیک بندر د هند اوبو ته د لاسرسي ترڅنګ د ټرانزیټ، سوداګرۍ، ټرانسپورټ او د سمندر له لارې د لېږد را لېږد تر ټوله مناسبه لار ده.
هغه زیاته کړې:« د ایران په سوېل کې د چابهار ستراتيژیک بندر د ایران، منځنۍ آسیا او په ځانګړي ډول افغانستان ترمنځ د سوداګرۍ په برخه کې ځانګړی ارزښت لري. دغه بندر د ۸ میلیونو او ۵۰۰ زرو ټنه توکو د تخلیې او بارولو ظرفیت په لرلو سره د افغان سوداګرو او پانګوالو لپاره ښه فرصت رامنځته کوي.»
عسکري د افغان خصوصي سکټور په ګډون له ټولو خصوصي سکټورونو غوښتي چې د چهار بندر د ظرفیت لوړونې او فعالیتونو د چټکوالي لپاره خپلې پانګونې هلته انتقال کړي.
په ورته مهال، د افغانستان د صنعت او سوداګرۍ وزارت مسوولین دغه بندر له هند سره د ټرانزیټ او د نورو اقتصادي لارو ښه بدیل ګڼي.
دوی زیاتوي، په یاد بندر کې د افغان سوداګرو لپاره د اسانتیاوو رامنځته کولو او د ستونزو د حل په موخه د اقتصادي مرستیالۍ او صنعت او سوداګرۍ وزارت چارواکو د ایران له حکومت سره خبرې کړې دي.
د صنعت او سوداګرۍ وزارت ویاند اخندزاده عبدالسلام جواد وايي: « د اسلامي امارت د اقتصادي موخو لپاره د چابهار بندر اهمیت ته په کتو، د اقتصادي مرستیالۍ پر مشرۍ او د صنعت او تجارت وزارت د مشرتابه په ګډون د افغانستان اسلامي امارت لوړ رتبه پلاوي له چابهار بندر لیدنه وکړه او د تجارتي، اقتصادي اړیکو پراختیا او ټرانزیټي لارو د ښه کولو په موخه، له ګڼو ایراني چارواکو سره په څو ناستو کې، په دې اړه خبرې وکړې.»
چابهار بندر چې د ټرانزیټ لپاره خورا مهمه لاره ګڼل کېږي، د یاد بندر د ګډو هېوادونو د تودو اړیکو پر رغولو سربېره د افغانستان لپاره نورې کومې ګټې لري؟
د اقتصادي چارو شنونکی عبدالنصیر رشتیا وايي: « افغانستان له وچې سره تړلی هېواد دی او آزادو اوبو ته لاسرسی نه لري. له بلې خوا، افغانستان له اوږدې مودې راهیسې په یوه مسیر او یه بندر باندې متکي و او کله چې سیاسي ستونزې جوړېدې، پاکستانیانو خپل بندرونه د فشار اړمونو په توګه کارول. اوس چې د چابهار بندر بحث دی، بېله شکه دغه بندر د کراچۍ بندر په نسبت ۸۰۰ کیلومټره نږدې او د عباس بندر په پرتله۹۰۰ کیلومټره نږدې دی. کله چې له دې بندر ګټه اخیستنه پيل شي، افغانستان به له نویو بازارونو سره ونښلوي او موږ کولی شو له دې لارې ډېر په اسانه د نړۍ له نورو هېوادونو سره وصل شو.»
د ایران چابهار بندر هند ته د افغانستان د صادراتو لپاره یوه ښه لاره بلل کېږي.
د سوداګرۍ او صنعت وزارت د مالوماتو له مخې، هر کال له دې لارې د نږدې ۳ میلیارد ډالرو په ارزښت سوداګري ترسره کېږي.
