په داسې حال کې چې ايران له افغانستان سره د اقتصادي اړيکو د پراختيا په هڅه کې دی، وړمه ورځ یې دولتي پلاوی کابل ته راغلی او د حکومت یو شمېر اقتصادي بنسټونو مسوولینو له ياد پلاوي سره په يوه ګډه ناسته کې دواړو هېوادونو د سوداګرۍ پر شريکو مسايلو بحثونه وکړل.
چارواکي وايي، ایران د افغانستان په سوداګرۍ کې حیاتي رول لري او باید د چاربهار په شمول د اوسپنې پټلۍ په برخه کې هم ورسره همکاري وکړي.
د صنعت او سوداګرۍ وزارت مرستيال قدرت الله جمال وايي:« افغانستان او ایران له اوږدې مودې راهیسې له یو له بل سره نږدې ټولنیزې، تاریخي او اقتصادي اړیکې لري او د دوی د ګاونډي او دوست هېواد په توګه دا لازمه ګڼو چې له یو بل سره نږدې اقتصادي او سوداګریزې اړیکې ولرو.»
د سوداګرۍ او پانګونې خونې سرپرست یونس مومند وايي:« دا چې هند ستاسې په پرتله له موږ ډېر لېری دی؛ خو بیا یې هم موږ ته ترجیحي تعرفه راکړې؛ نو له تاسې سره هم مذهبه، هم کلامه او هم دوسته یو او غواړو چې د ایران د ۲۷ ډلې ګمرکي توکو سره سم موږ ته د وچو مېوو لپاره ترجیحي تعرفه راکړل شي او موږ ترې ګټه واخلو.»
د مومند په خبره ایران همدا تېر کال افغانستان ته د څه د پاسه یو مېلیارد ډالرو په ارزښت صادرات لرل او تمه یې وښوده، چې د افغانستان صادراتو ته هم په دغه برخه کې پاملرنه وشي.
مومند زیاتوي: « په دې هېله چې د یوه ښه ګاونډي او د یوه ښه دوست هېواد په توګه باید دې ته پاملرنه وکړو، چې څنګه کولی شو خپل صادرات زیات کړو او د کانونو، روغتیا، ټرانسپورټ او ساختماني برخو کې موږ حاضر یو چې له تاسې سره پانګونه وکړو.»
د افغانستان لپاره د ایران ځانګړی استازی او د راغلي اقتصادي پلاوي غړي ژمنه کوي، چې له نړۍ سره د افغانستان سوداګرۍ ته به د چاربهار او نورو بندرونو له لارې پراختیا ورکړي.
دغه راز دوی زیاته کړه، چې کابل او تهران به د سوداګرۍ په برخه کې د اوسپنې پټلۍ له لارې هم اغېزناکه ونډه ولري او فرصت یې دی، چې سوداګریزو بندورونو کې د اړتيا وړ امکانات برابر کړي.
د افغانستان لپاره د ایران ځانګړی استازی حسن کاظمي قمي وايي: « د افغانستان او ایران دننه په ګډو سرحدونو کې پانګونه هغه موضوع ده چې موږ لومړیتوب ورکړی. بله مسله دا ده چې موږ به د خپل کار پيل د دواړو خواوو په همکارۍ کوو او دا ډاډ درکوو چې یو شمېر لویې پروژې به له نورو هېوادونو سره هم په ګډه پرمخ وړو.»
د ایران د خراسان والي مهندس نظري وايي: « د دې پلاوي د راتلو موخه دا ده چې په بېلا بېلو برخو کې اقتصادي اړیکې او تعاملات پراخه کړو، هم د سوداګرۍ او پانګونې په برخه کې او هم فني او ټکنالوژۍ او بله هره هغه برخه کې چې دواړه هېوادونه ورته اړتیا لري.»
د افغانستان او ایران تر منځ په یاده ګډه اقتصادي غونډه کې ټینګار پر دې وشو، چې د ګډې او اغېزناکې سوداګرۍ لپاره به ټولې هغه لارې چارې تر سره شي، چې له کبله يې د دواړو هېوادونو سوداګري ګټوره کېدای شي.
ایراني پلاوی ټينګار کوي، چې هېواد يې د هرات زلزله ځپلو کورنیو لپاره روغتیايي او نور ټيمونه هم استولي، څو د قربانیانو لپاره خدمات وړاندې کړي.
