د اوزبېکستان د سوداګرۍ او صنایعو خونې په مشرۍ یوه پلاوی بلخ ته د سفر پر مهال ویلي، غواړي په مزار شريف ښار کې د نساجۍ يوه فابرېکه جوړه کړي.
د دوی په خبره، دغه فابریکه به هر کال ۱۵ زره ټنه نساجي توکي تولید کړي او سلګونه افغانانو ته به د کار کولو زمينه هم برابره کړي.
اوزبېک سوداګرو د نساجي فابرېکې پر جوړولو سربېره، افغان سوداګرو ته د کرنې په مکانيزه کولو، د سړو خونو په جوړولو او سمنټو په تولید کې هم د خپلو همکاريو ډاډ ورکړی.
د اوزبېکستان د سوداګرۍ او صنايعو خونې مرستیال عبدالرحمانوف سهراب وايي: « موږ د بلخ له والي سره د همکاریو، د نساجي فابریکې جوړولو او کرنیزو پروژو په اړه خبرې وکړې. دغه فابریکه به هر کال ۱۵زره ټنه تولید ولري او ګڼو کسانو ته به د کار کولو زمینه برابره کړي. همداراز په بلخ کې به د پنبې نوی تخم وکرل شي او بامیانو ته به د کچالانو اصلاح شوي تخمونه ولېږدول شي.»
اوزبېک سوداګرو دغه راز ویلي، افغانستان په ځانګړي ډول شمالي ولایتونه د کرنې او صنعت لپاره مناسب فرصتونه لري او د ګډو همکاریو له لارې کولی شي دواړو هېوادونو ته اقتصادي ګټې ورسوي.
دوی همداراز زیاته کړې، په بلخ کې پر۱۰۰ هکټاره ځمکو د پنبې د یوه سېرحاصله تخم کرلو پلان لري او په خبره یې، د دې پروژې موخه په افغانستان کې د پنبې حاصلاتو زیاتوالی او د نساجۍ صنعت لپاره د خامو موادو برابرول دي.
اوزبېکستاني سوداګر نادر اوف وايي: « افغانستان او په ځانګړي ډول شمالي ولایتونه د کرنې او صنعت لپاره ښه فرصتونه لري او موږ کولی شو د ګډو همکاریو له لارې دواړو هېوادونو ته ګټه ورسوو. موږ د پرله پسې سفرونو په ترڅ کې دې نتيجې ته ورسېدو چې په افغانستان کې د کرنې مکانيزه کولو او سمنټو تولید په برخو کې کار وکړو. موږ له افغان بزګرانو سره د کرنې په مکانيزه کولو کې همکاري کوو او د سمنټو تولید په برخه کې پانګونه کوو. د جغرافیوي نږديوالي له امله دا برخې د دواړو هېوادونو په ګټه دي.»
د بلخ سوداګرۍ او پانګونې خونې د دارالانشا رییس اسدالله اسدي وايي: « تاسو وینئ چې د تورخم لارې له تړل کېدو وروسته په سیمه کې د افغان سوداګرو لپاره ډېر زیات فرصتونه برابر شول. افغانستان د خپلو ټولو ګاونډیو هېوادونو په پرتله د توکو د مصرف او خریدارۍ زیات پوټنشیل لري.»
بله خوا، افغان سوداګر هم اوزبېکستان د افغانستان لپاره مهم اقتصادي شریک بولي او وایي، د دواړو هېوادونو ترمنځ اقتصادي اړیکې په وروستیو کلونو کې پراخې شوې دي او افغان سوداګر باید د اوزبېک سوداګرو له تجربو، ټکنالوژۍ او ګډو پانګونو ګټه واخلي.
د بلخ سوداګرۍ او پانګونې خونې مرستیال نصیر احمد سلطان زاده وايي: « دا هرڅه د دې څرګندونه کوي چې اوسمهال زموږ دولت امنیت ټینګ کړی او د پانګونې لپاره یې فرصتونه برابر کړي. له اوزبېکستاني پانګوالو سره د همکاریو لاسلیک کړي هوکړه لیکونه هم څرګندوي چې افغانستان پر خپلو پښو د درېدو په حال کې دی. موږ د اوزبېکستان پانګوالو او سوداګرو ته بلنه ورکوو چې په ډاډه زړه افغانستان کې پانګونه وکړي. همدارنګه افغان سوداګرو ته هم ګاونډي اوزبېکستان کې له شته فرصتونو ګټه واخلي.»
بلخ د افغانستان له مهمو سوداګریزو ولایتونو ګڼل کېږي او د حیرتان بندر له لارې له اوزبېکستان سره نږدې اقتصادي اړیکې لري؛ هغه اړیکې چې اوس د صنعت او تولید په برخو کې د پراختیا نوي پړاو ته د داخلېدو په حال کې دي.
