د امریکا سپینې مانۍ ویاندې جن ساکي د سې شنبې پر ورځ د «۱۴۰۰ کال د لېندۍ پر ۲۳ مه» په یوه خبري کنفرانس کې وویل،امریکا تر اوسه پورې ډاډه نه ده،چې دغه نهه اعشاریه پنځه میلیارده ډالر څه ډول د افغانانو پر ځای د طالبانو لاسته نه لوېږي او د خپلې پرېکړې لپاره یې درې دلایل وړاندې کړل.
ساکي زیاته کړې:« لومړی، د سپټمبر یوولسې قربانیانو کورنیو غوښتنه کړې ده، دا دعوا مهمه ده. دویم، امریکا لا هم طالبان د ترهګرې ډله په توګه پیژني او د دوی ځینې غړي د ملګرو ملتونو په تور نوملړ کې دي. درېیم، امریکا لا هم ډاډه نه ده،چې دا پیسې به څنګه عامو افغانانو ته ورکول کېږي او د طالبانو لاسونو ته به نه ځي.»
د واشنګټن دغې پرېکړې افغانان اندېښمن کړي او د دغو پیسو د خلاصولو او پر افغانستان د اقتصادي بندیزونو ختمولو لپاره له د امریکا او اسلاميامارت ترمنځ په تعامل ټینګار لري.
د اقتصادي چارو کارپوه محمد نبي افغان وايي:« یوازنۍ حل لاره زما په نظر د نړیوالو امریکا سره تعامل او د هغوی مشروع غوښتنو پوره کول دي،چي دافغانستان په زیان نه وي، ځکه پرته له هغې هېڅ ډول لاره پاتې نه ده،چي د افغانستان کنګل شوي پیسې خوشي کړي.»
د یو شمېر نورو په باور که د افغانستان کنګل شوې پانګه ازده نه شي او لګېدلي بندیزونه په همدې شکل دوام وکړي،روان بشري ناورین به نه یوازې سیمې بلکې د امریکا لپاره هم سرخوږی جوړ کړي.
اقتصادي چارو کارپوه عبدالنصیر رښتیا وايي:« که امریکا خپلي دغې کړنې ته دوام ورکړي اصلي زیان به امریکا وګوري او وروسته د سیمي ګاوندي هېوادونه،ځکه دلته خلک په بد اقتصادي حالت کي دي اوغواړي د ژوند کولو لپاره ګاونډیو هېوادونو ته ولاړ شي.»
واشنګټن داسې مهال نړیوالو بانکونو کې د افغانستان پانګې له ازادولو انکار کوي،چې پر افغانستان د امریکا او نړیوالو له خوا د لګېدلو بندیزونو له امله میلیونونه افغانان له لوږې سره مخ دي او د افغانستان مالي او بانکي نظام مخ پر سقوط دی.
