د امریکا بهرنیو چارو وزیر انټوني بلینکن وايي:« ولسمشر بایډن چې کوم فرمان صادر کړی او د افغانستان بانک، ۳.۵ میلیارده ډالر یې له افغانانو سره د بشري مرستې په موخه جلا کړي دي. دا کار یې د افغانستان پر ګټه کړی دی او له افغانانو سره د بشري مرستې په موخه شوی دی. امریکا د افغانانو ملاتړ کوي.»
د ځینو لویدیځو بنسټونو ترڅنګ پر بشر حقونو د څار سازمان د بایډن د دغې پریکړې مخالفت کړی او ویلي یې دي،چې امریکا د افغانانو شتمني خپلول غواړي.
پر بشر حقونو د څار اداره :« د امریکا ولسمشر جو بایډن د افغانستان د شتمنۍ په تړاو د وروستي فرمان په صادرولو سره د افغانانو د شتمنۍ د راخپلولو په لټه کې دی،ځکه دا پیسې د افغانستان د ولس شتمني ده. له دې کار سره به افغانستان له یوې سترې اقتصادي ستونزې سره مخ شي. اوس مهال باید ډېر تمرکز پر دې شوای وای،چې له افغانانو اقتصادي بندیزونه لرې کړای شوي وای.»
د نړیوال اقتصادي بیړني ځواک قانون او د دښمن د سوداګرۍ قانون له مخې امریکا ځان ته دا صلاحیت ورکړی دی،چې له اسلامي امارت سره د سیاسي او نظامي مخالفت په ترڅ کې دغه پیسې کنګل کړي خو د ویشلو او ولکې حق یې نه لري.
د اقتصادي چارو شنونکی نورالله عزیز وايي:« په نړیوالو اصولو کې هېڅ هېواد یا هېڅ حقوقي شخصیت د دې صلاحیت نه لري،چې د بل شخصیت پانګه د هغه له شتون پرته او د محکمې د حکم نه درلودلو په صورت کې تر خپل واک لاندې راولي. لسیزې وړاندې چین د هانګ کانګ پیسې کنګل کړې وې،خو کله چې هانګ کانګ نیمه خودمختاره شو، دغه پیسې یې بېرته ترلاسه کړې.»
د اقتصادي چارو شنونکی عبدالقادر جیلاني وايي:« دغه حکم د نړۍ د بانکدارۍ د اصولو خلاف کار دی او د افغانانو په حق کې ستره جفا ده، که چیرې د افغانانو درې نیم میلیارده ډالره شتمني د غرامت په ډول د سپټمبر د ۱۱مې په قربانیانو ویشل کیږي،نو په تیرو شلو کلونو کې افغانانو زرګونه قربانۍ ورکړي،چې د دوی قرباني به بیا څوک ورکوي.»
نظرونه دا دي،چې د سپټمبر ۱۱مې برید عاملینو کې ۱۹ غړي وو چې ۱۵ یې د سعودي عربستان، ۲ د متحده عرب اماراتو، یو د لبنان او بل د مصر اوسېدونکی و او یو افغان هم په دې برید کې لاس نه درلود.
د ۹.۶ میلیارده ډالر هغه پانګه ده،چې له ۱۹۶۰ کال راهیسې د مرکزي بانک له لوري په بېلابېلو هېوادونو کې په مختلفو بڼو، پانګونه شوې ده. دا پانګه په ۲۰۰۸ کال میلیاردونه ډالر شوه او د ۲۰۲۱ کال تر وروستیو ۹.۶ میلیاردو ډالرو ته ورسیده،چې د افغانستان نړیواله پشتیبانه یادېږي.
