د ریاست الوزرا اقتصادي مرستیالۍ وايي، د روان ۱۴۰۳ کال له پیل راهیسې د هېواد په بېلابېلو ولایتونو کې ۱۶ لویې او کوچنۍ اقتصادي او بنسټیزې پروژې پرانیستل شوې.
د اقتصادي مرستیالۍ پر خپله اېکس پاڼه لیکلي، دغه پروژې د ریاست الوزرا اقتصادي معاونیت له لوري د انرژۍ، اوبو مدیریت، زیربناوو او بنسټیزو سکټورونو په برخو کې دي چې عملي چارې یې پیل شوي.
اقتصادي مرستیالۍ زیاته کړې، په دې ډله کې د څه باندې ۲۲میګاواټه لمریزې برېښنا، د طوطي میدان د ګازو استخراج، د کابل ارغندې سبسټېشن، پاشدان، پلتوني او آغاجان د اوبو بندونه، د نیله باغ هستوګنیزه پروژه، د خواف هرات ریل لارې پروژو ترڅنګ د کابل-جلال آباد او کابل-غزني دویم لین سړک او د هرات-غور د سړک رغولو په څېر پروژې شاملې دي.
د اسلامي امارت مرستیال ویاند حمد الله فطرت وايي: « د ریاست الوزراء اقتصادي مرستیال له لوري د روان ۱۴۰۳ لمریز کال په اوږدو کې تر دې مهاله د انرژۍ، زېربناوو، ټرانسپورټ او اوبو مدیریت په برخو کې ۱۶ بېلابېلې پروژې پرانیستل شوې دي. په دغو پروژو کې د ۲۲.۷۵ مېګاواټه لمریزې برېښنا، د ارغندۍ سب سټېشن پراختیا، د پاشدان، پلتوني او آغاجان بندونو پرانیستل، او د کابل – جلال آباد او کابل – غزني دویم لین سړکونو پرانیستل شامل دي.»
د اقتصادي چارو شنونکي په هېواد کې د ورته اقتصادي پروژو پرانیستل نه یوازې د هېواد په اقتصادي وده کې ګټورې ګڼي، بلکې د بېوزلۍ په کمولو کې یې هم مهمې بولي.
د اقتصادي چارو شنونکی نورالله عزیز وايي: « همدغه پانګونې چې د کوچنیو او منځنیو پروژو په برخه کې دي، د لویو پروژو او لویو پانګونو لپاره فرصتونه برابروي. دا ځکه چې همدا پروژې دي چې د لویو پروژو یا لویو پانګونو اجناس ترلاسه کوي یا یې دوی خپله په مصرف رسوي. په دې ډول د لویو پروژو د تطبیق لپاره د تقاضا کچه لوړېږي.»
ځېنې نور بیا په دې اند دي چې اوس مهال ډېری افغان ځوانان په هېواد کې د کاري فرصتونو نه شتون له امله په غیرقانوني او قاچاقي لارو ګاونډیو او اروپايي هېوادونو ته ځي، دغه شان اقتصادي پروژې کولی شي د کاري فرصتونو په رامنځته کولو کې همکاري وکړي.
د اقتصادي چارو شنونکی محمد یونس ځدراڼ وايي: « دا پروژې د بېکارۍ له منځه وړلو لپاره، بهر ته زموږ د ځوانانو د تګ منع کېدو لپاره حکومت ته اړتیا ده چې په لویو پروژو عملي کار شروع کړي؛ ترڅو زیاتره ځوانانو ته د کار زمینه برابره شي. همدارنګه باید په افغانستان کې دننه فابریکو ته توجه وشي او لا ډېرې فابریکې ایجاد شي. په دې کې به یوه ګټه دا وي چې د افغانستان زیاتره وګړي به پر کار بوخت شي او بله ګټه به یې دا وي چې زموږ به صادرات زیات شي.»
دا په داسې حال کې ده چې واک ته د اسلامي امارت له رسېدو سره هم مهاله په هېواد کې د قوشتپې کانال او ټاپي په څېر د لويو پروژو عملي کارونه پیل شوي چې ټولیز لګښت یې میلیونونه افغانیو ته رسېږي او ډېری هغه يې له کورنیو عوایدونو تمويل کیږي.
