افغان او اروپايي ټولنې چارواکو پر دوه اړخیزو موضوعاتو خبرې کړې

د بهرنیوچارو وزارت د ویاند عبدالقهار بلخي پر مشرۍ بروکسیل ته تللي افغان پلاوي د اروپايي ټولنې له غړو هېوادونو سره په اروپا کې مېشتو افغانانو ته د کونسلي خدمتونو پر بیا پیلېدو، د دواړو لوریو ترمنځ  پر باور جوړونې خبرې کړې دي.

عبدالقهار بلخي پر خپله اېکس پاڼه لیکلي، د دغه سفر پر مهال یې له اروپايي لوري سره د هغو افغانانو د ستونزو پرحل هم غږېدلی چې د پناه غوښتنې غوښتنلیکونه یې نه دي منل شوي او دمګړۍ له ګڼو ستونزو سره مخ دي.

بلخي تمه ښودلې چې د مثبت تعامل لپاره نه یوازې دا چې لار پرانیزي بلکې په اروپا کې د مېشتو افغانانو ستونزې به هم حل کړي.

هغه زیاته کړې:« د اروپايي ټولنې له غړو هېوادونو سره په څو اړخیزو او دوه اړخیزو ناستو کې مو په اروپا کې مېشتو افغانانو ته د کونسلي خدمتونو پر بیا پیلېدو ، پر باور جوړونې ، اغیزمن حضور او د هغو افغانانو د ستونزو د حل په لارو چارو بحثونه وکړل چې د پناه غوښتنې غوښتنلیکونه یې نه دي منل شوي او له ستونزو سره مخ دي. هیله کیږي چې دا سفر به د مثبت تعامل لپاره نوې لارې پرانیزي په بهر کې مېشتو افغانانو ستونزو ته د رسیدنې بهیر پیاوړی او د متقابل درناوي او ګډو ګټو پر بنسټ د همکارۍ فضا لا پراخه کړي.»

د بهرنیو چارو وزارت د ویاند مرستیال ضیا احمد تکل وايي:« هلته له اروپايي ټولنې سره په دوه اړخیزو او څو اړخیزو مسایلو باندې بحثونه ول چې یو له هغو بحثونو په اروپا کې د مېشتو افغانانو لپاره د کونسلي خدماتو وړاندې کول وو او هلته د افغانانو حقونو خونديتوب او د نورو اسانتیاوو ورته چمتو کول وو. تمه ده چې دغه سفرونه به دوام ولري، د پلاویو تګ راتګ به دوام پیدا کړي او هیله لرو چې اروپا کې د افغان حکومت د استازو د اغیزمن حضور به وکولای شي چې اروپا کې مېشتو افغانانو ته اړینې اسانتیاوې برابر کړي او د افغانستان او اروپا ترمنځ ښکلیتیاوې زیاتې شي، ترڅو رغنده تعامل ته لاره برابره شي.»

په ورته مهال د بهرنیو چارو وزارت دویم سیاسي رییس ذاکر جلالي وايي، اروپا ته د افغان پلاوي سفر به د دومداره تعامل لپاره لار هواره کړي او همدا راز په اروپا کې مېشت افغانان به له باوري خدمتونو او خپل هېواد سره د اغیزناکو اړیکو برخمن کړي.

جلالي څرګنده کړې:« زه هیله‌ من یم چې دا سفر به د متقابل درناوي او ګډو ګټو پر بنسټ د لا عملي او دوامدار تعامل لپاره لاره هواره کړي او همدارنګه به مرسته وکړي چې په اروپا کې مېشت افغانان له باوري خدمتونو او له خپل هېواد سره د اغېزمنو اړیکو او ارتباطي لارو څخه برخمن شي.»

له سیاسي اړخه بیا د افغان پلاوي دغه سفر ته تمې زیاتې دي چې د کارپوهانو په باور دغه سفر له اروپايي ټولنې سره د افغانستان د تعامل لپاره زمینه برابره کړي او همدا راز د باور فضا به رامنځته کړي.

د سیاسي چارو شنونکی شهزاده مسعود وايي:« زما په اند باندې خپله د پلاوي تګ یو ځانګړی اهمیت لري. دویم دا چې اروپايي ټولنه دغه شان یوې ناستې ته د داسې یوه پلاوي ته بلنه ورکول، دا په خپله د تعامل لپاره لاره خلاصوي. زه هیله لرم چې له دې سربېره چې هلته به د افغانانو ستونزې وي، بې له شکه چې اجنډا هم همدغه ده، خو له دې سره کېدلای شي چې په راتلونکې کې نورو سیاسي تعاملاتو ته هم لاره هواره شي.»

د بهرنیو چارو وزارت د څلورم سیاسي رییس په مشرۍ بروکسیل ته د افغان پلاوي د دې سفر موخه په اروپا کې مېشتو افغانانو ته د کونسلي خدمتونو د وړاندې کولو له سره پیل ستونزو ته یې رسېدنه او د اروپايي ټولنې له غړو هېوادونو سره په دوه اړخیزو خبرو ناستې ښودل شوې دي.