د افغانستان برېښنا شرکت او اوزبېکستان د انرژۍ وزارت شرکتونو ترمنځ د ۲۴۳ میلیونو ډالرو په ارزښت د برېښنا لېږد او سب سټېشنونو جوړولو څلور تړونونه لاسلیک شول چې ورسره به زرګونه کسانو ته د کار زمینه برابره شي.
د افغانستان برېښنا شرکت چارواکي وايي، د۲۱۰ کيلو مټرو په اوږدوالي د برېښا مزي غځول چې له امله به یې د الوان دښتې په سبسټېشن کې د ولتاژ لوړالی، د ارغندې سبسټېشن پراختيا او بيا له همدې سبسټېشن څخه تر ننګرهار پورې د ۲۲۰ کيلوولټ برېښنا لېږد مزي غځول او د ننګرهار شيخ مصري صنعتي پارک کې د نوي سبسټېشن جوړول هغه مهمې پروژې دي چې د يادو تړونونو په چوکاټ کې به پلې شي.
د افغانستان برېښنا شرکت اجرایيوي ریيس عبدالباري عمر وايي: « د ۲۱۰ کیلومټرو په اوږدوالي به د ۵۰۰ کیلوولټ لین، د دشت الوان په سب سټېشن کې د ظرفیت لوړول چې تر ۱۰۰۰ مېګاواټو به د نور جذب توان هم ولري، د ارغندۍ په سب سټېشن کې د ۸۰۰ مېګاولټ امپیر په ظرفیت سره د دې سب سټېشن پراختیا او بیا له همدې ارغندۍ سب سټېشن تر ننګرهار پورې د ۲۲۰ کیلو ولټ لین غځول چې ډبل کنټکټور او ډبل سرکېټ په بڼه به وي او دغه راز به ننګرهار کې د شیخ مصري سب سټېشن جوړېږي. دا ۲۲۰ کیلوولټ لین په داسې ډول ډیزاین شوی چې دواړو طرفونو ته تر ۷۰۰ مېګا واټو انرژي لېږدولی شي؛ یانې که اړتیا شوه له ننګرهار به کابل ته او اوس مهال له کابل ننګرهار ته برېښنا لېږدول کېږي.»
په ورته مهال د اږزبېکستان انرژۍ وزیر ياد تړونونه د دواړو هېوادونو ترمنځ د ښې همغږۍ پايله بولي او زياتوي، دا پروژې به د افغانستان صنعتي پرمختګ ته د لارې هوارولو ترڅنګ د دواړو هېوادونو سیاسي او اقتصادي اړیکې هم پياوړې کړي.
د اوزبېکستان د انرژۍ وزیر جورابېک میرزا محمدوف وايي: « نننی تړون په مستقيمه بڼه د دواړو هېوادونو د رهبرۍ د ملاتړ پايله ده، ترڅو پرمختګونو ته لاره هواره شي. دا پروژې خورا مهمې دي او د افغانستان صنعتي پرمختګ په برخه کې اساسي رول لوبوي. له دې سره به د دواړو هېوادونو سیاسي او اقتصادي اړیکې لا پیاوړې شي.»
دا پروژې به د ۱۸ کاري مياشتو په دوام بشپړې شي چې پر اساس به يې له ۸۰۰ تر ۱۰۰۰ مېګاواټه برېښنا له ګاونډي اوزبېکستان ترلاسه شي او تر يوه بريده به په کوردننه د برېښنا ستونزه حل کړي.
