اسلامي امارت له پاکستان سره د سوداګرۍ له بندېدو وروسته د هرات تورغونډۍ بندر له لارې منځنۍ اسیا ته د سوداګرۍ خدمتونو د تنظیم هڅې زیاتې کړې دي.
د دولتي شرکتونو عمومي رییس وايي، په تورغونډۍ بندر کې یې د ستراش په نوم د دولتي شرکت خدمتونه معیاري کړي چې د ټرانزیټ له زیاتېدو سره به یې چارې نورې هم منظمې شي.
احمد جان بلال له تورغونډۍ څخه ترکمنستان ته د تازه مېوو صادراتو پیلولو ته په اشارې زیاتوي، د افغانستان تازه مېوو خرڅلاو لپاره یې د پاکستان په ځای بدیلې لارې پیدا کړې دي او د نورو لارو د پیدا کولو په اړه هڅې روانې دي.
د دولتي شرکتونو لوی رییس وايي: « داسې فکر کېده چې له پاکستان سره تر لارو بندېدو وروسته به د افغانستان د محصولاتو لپاره مارکېټ نه وي او زموږ بزګران او سوداګر به له ستونزو سره مخ شي. دا خدای په فضل نورې بدیلي لارې پيدا شوي او موږ یې دا دی شاهدان یو چې زموږ مڼې ترکمنستان هېواد ته صادرېږي.»
په ورته مهال، په تورغونډۍ بندر کې د ستراش دولتي شرکت مسوولین وايي، له دې لارې منځنۍ اسیا ته د افغان توکو د صادراتو او دغه راز له یادو هېوادونو څخه وارداتو لپاره هر اړخیزې اسانتیاوې چمتو شوې دي. د مسوولینو په خبره، د ټرانزیټ له زیاتېدا سره به د دوی په خدمتونو کې هم بدلونونه راشي.
د ستراش دولتي شرکت مسوول عصمت الله وايي: « که چېرې سوداګر غواړي چې په دې بندر کې ۲۴ ساعته کار وشي، موږ دېته چمتو یو. موږ په یوه وخت کې کولی شو تر ۵۰۰ واګونونه تخلیه کړو.»
د ستراش شرکت مالي او اداري چارو آمر میرحمزه جمالي وايي: « دا یو خدماتي شرکت دی چې تخلیه او بارګیري یې دنده ده. دا شرکت په اړینو عصري وسایلو او ټکنالوژۍ سمبال دی.»
د خصوصي ټرانزیټي شرکتونو مسوولین او کارکوونکي له تورغونډۍ بندر څخه د ترکمنستان په ګډون د منځنۍ اسیا هېوادونو ته د تازه مېوو د صادراتو په تړاو د اسلامي امارت له خوا د اسانتیاوو له رامنځته کېدو خوشاله دي.
د دوی په خبره، د ټرانزیټ په زیاتېدو سره په کارونو او سوداګرۍ کې منفي اغېزې نه دي رامنځته شوې.
د ازاد میهن شرکت مسوول صحت محمدي وايي: « په ټول توان له موږ سره همکاري کېږي. سره له دې چې نن د جمعې ورځ او رخصتي ده، خو بیا هم مسوولین له موږ سره همکار دي. همدارنګه زموږ د کارونو ترسره کېدو لپاره امکانات برابر شوي دي.»
کارګر محمد نعیم اسحق زی وايي: « موږ اوس د شپې تر لسو بجو کار کوو، خو موږ چمتو یو چې تر سهار کار وکړو. موږ په خپل وطن کې په کار خوښ یو او هر ډول شرایط مو قبول دي.»
له تورغونډۍ لارې د منځنۍ اسیا هېوادونو ته د اورګاډي پټلۍ او موټرونو په وسیله سوداګري کېږي چې که څه هم کلنی ارزښت یې څرګند نه دی، مګر په دې په وروستیو کې له پاکستان سره د ټرانزیټ له تړل کېدو وروسته له دغې لارې ترکمنستان ، قزاقستان او روسیې ته د افغانستان د تازه مېوو صادرات زیات شوي.
