خصوصي سکتور، چابهار بند کې بانکي اسانتیاوې غواړي.
سوداګرۍ خونه په چابهار بندر کې د بانکي خدمتونو اسانتیاوې غواړي.
اوس چې چابهار بندر کې د افغان سوداګرو د پانګونې ترڅنګ له هند سره د افغانستان د صادراتو او وارداتو بهیر پېل شوی خصوصي سکتور هلته د افغانستان بانک څانګو فعالیت اړین ګڼي.
د افغانستان بانک مسوولین وایي، چابهار کې د افغان بانکونو فعالیت په اړه يې د ایران د مرکزي بانک لایحه له خصوصي بانکونو سره شریکه کړې ده.
خصوصي سکتور وایي هغه پانګوال چې د چابهار ازاده ساحه کې فعالیت لري د بانکي خدمتونو نشتوالي له امله له ستونزو سره مخ دي.
اقتصادي اړیکې له بانکي اسانتیاوو پرته ناشونې دي، نو ځکه ټینګار کېږي چې دا اسانتیاوې رامنځ ته شي.
د افغانستان بانک مسوولین وایي بهرنیو هېوادونو کې د افغان بانکونو د فعالیت زمېنې برابرول د دوی، خو، څارنه یې د اړوند هېواد مسوولیت دی.
چابهار بندر کې د افغان بانکونو فعالیت لایحه د هېواد بهرنیو چارو وزارت په همکارۍ د ایران له مرکزي بانک اخیستل شوي او اوس یې په تړاو د بانکونو ظرفیت ارزول کیږي.
افغان سوداګرو چابهار بندر کې د شاوخوا ۷۵ میلیونه ډالرو په اندازه پانګونه کړې.
اندیښنې دا دي که حکومت چابهار کې بانکي خدمتونه برابر نکړي، د پيسو لیږد رالیږد ننګونې له دې بندر سره سوداګري زیانمنه کړي.
