افغانستان کې سوله د نړۍ پر امنیت اغیز لري او هیڅ هېواد دې خپله ګټه د افغانستان په جګړه کې نه لټوي.
د سولې شورا مشر کریم خلیلي سویلي کوریا کې د سولې په تړاو ناسته کې د نړۍ له هېوادونو غوښتي، چې د افغاستان سولې په تړاو دې خپلې هڅې لا ډېرې کړي.
تحلیل کونکي بیا د سولې پر شورا نېوکه لري چې د سولې په تړاو غوڅ دريځ نه لري او په دې برخه کې یې لاسته راوړنې د پام وړ نه دي.
مسکو کې د سولې په تړاو د افغان سیاسیتوالو او طالب استازو تر منځ د سولې خبرو اترو وروسته د سولې عالي شورا مشر کریم خليلي سویلي کوریا کې د سولې او ثبات تر سرلیک لاندې ناسته کې ګډون کړی.
کریم خليلي دافغانستان سوله د نړۍ امنیت لپاره مهم بللې او د ناستې له ګډوانوالو یې غوښتي څو په هغو هېوادونو فشار ډېر کړي چې د افغانستان په جګړه کې خپلې ګټې لټوي.
کریم خلیلي داسې ویلي ((ښکاره خبره ده کله چې په یوه هېواد کې جګړه وي منفي اغیزې یې یوازې د نوموړي هېواد په جغرافیه کې نه منحصریږي، بلکې نور هېوادونه هم اغیزمن کوي.
د نړۍ د هېوادونو ګټې له یو بل سره تړلي دي. که په کوم هېواد کې جګړه کیږي، پرته له شکه نورو هېوادونو باندې هم ناوړه اغیزه درلودلی شي.))
کانفرانس کې د سولې شورا له نړیوالو غوښتي چې د افغان سولې بهیر ملاتړ وکړي او د افغان حکومت او طالبانو تر منځ د سولې خبرو اترو پرانیستې لپاره دې همکاري ډېره کړي.
تحلیل کونکي بیا د سولې په تړاو د سولې شورا پر رول نېوکې لري او د سولې په برخه کې د یادې ادارې کړنې نمایشي او غیر اجریوايي یادوي
د افغانستان د سولې ورکې کیلي موندنې پسې په دې ورستیو کې هڅې ډيرې شوي دي. وړانديز دا دی چې د خبرو اترو سربیره دې نظامي فشار ډېر شي تر څو د حکومت وسلوالې ډلې سولې ته مجبور شي.
