کابل کې د عمده پلورنځیو مالیکن:  کاروبار مو خراب شوی

دوی وايي، کاروبار يې ځکه خراب او اغېزمن شوی، چې ډېری کسان  بې دندې او کاري فرصتونه له منځه تللي دي.

کابل ښار کې د خوراکي او غیر خوراکي توکو عمده پلورنځي مسوول وايي:« پخوا وضعيت ښه و، خو اوس لږ حالت خراب شوی دی. په  اوسني وخت کې خلک هم يو څه بې کاره شوي دي. بیې پورته روانې دي. هو! همداسې، اوس وخت کې خلک غريبان شوي دي.»

کابل ښار کې د خوراکي او غیر خوراکي توکو یوبل عمده پلورنځي مسوول بیا وايي:« د خلکو ستونزې زياتې دي، خدای دې رحم وکړي. اوس وخت کې د بیو د لوړوالي خبره ده. بله ستونزه  دا ده، چې د دولتي مامورينو تنخواوې یې نه دي ورکړي. دا سيستم يو زنځيري شکل لري، که هغوی تنخوا واخلي، رابه شي او سودا به واخلي، که  تنخوا وانخلي، نو سودا به چېرته وکړي.»

 د عمده پلورنځیو مسوولین وايي، اوس یې کار د پخوا په شان نه دی، زیات پلور نه لري او ځينې خوراکي توکې یې ان په خرابېدو دي.

دوی تمه لري، که خلکو ته د کاروبار زمینه برابره شي، د دوی پر کار به هم اغیز ولري.

کابل ښار کې د خوراکي او غیر خوراکي توکو د یوه عمده پلورنځي مسوول وايي:« وړاندې به موږ هره اوونۍ درې وارې سودا راوړه، اوس وخت کې فکر وکړه، چې دوه اونيو کې موږ يو وار هم سودا نه راوړو، ځکه پلور کم شوی دی.»

اخوا یو شمېر کابل ښاریان، چې پخوا به یې له لویو عمده پلورنځيو توکې اخیستل وايي، اوس زیاتې پيسې نه لري او هڅه کوي، له کوچنیو هټیو نه توکي وپېري.

د کابل ښار یو تن اوسېدونکی وايي:« په اصل کې خو لویو پلورنځیو ته خلک ځکه نه ورځي، چې پخوا به خلک ورتلل، لږ به يې بیې هم کم وې، پخوا به چې خلکو توکي اخېستل نو پوره به يې اخېستل، لکه غوړي به يې بوشکه اخېستله، يا اوړه به یې يوه بورۍ اخېستله، اوس نو من اوړه اخلي، غوړي پاکټي اخلي، نو لویو پلورنځیو کې بيا دا شيان کم نه ورکوی.»

نه یوازې دا چې کابل ښار کې د لویو هټيو مالکين د کاروبارونو له خرابوالي شکايت کوي، بلکې په ټول هېواد کې له هټيو سره سره ډېری کاروبارونه هم اغېزمن شوي دی.