مومند: د کابل او تهران ترمنځ شوې سوداګریزه هوکړه د افغانانو پر اقتصادي وضیعت مثبته اغېزه لري

مومند وايي:« هره هغه اسانتیا،چې د سوداګرۍ په برخه کې افغان سوداګرو ته برابریږي،په مستقیم ډول د افغانستان په بازارونو او لس مثبته اغیز لري.»

اخوا د افغان سوداګرو له لوري د افغانستان او ایران  ترمنځ سوداګریزه هوکړه،چې له مخې به یې  د دواړو هېوادونو ترمنځ په اسلام کلا بندر کې د سوداګرو لپاره اسانتیاوې برابرې شي، هرکلی کوي.

افغان سوداګر حاجي هاشم فاریابي وايي:« که وشي کولای،چې شوي توافقات په خپل وخت او په ریښتینې توګه عملي کړي،د افغانستان په بازارانو کې د ارتزاقي موادو د بیو پر ټیټوالي مستقیمه اغیزه لري.»

د دوشنبې په ورځ کابل کې د ایران افغانستان ترمنځ د سوداګرۍ هوکړه لاسلیک شوه، چې ټول موارد به یې د یوې میاشتې په موده کې د اسلام کلا په سوداګریز بندر کې پلي شي او  د دغې هوکړې له مخې به په راتلونکو لسو ورځو کې یو ایرانی پلاوی کابل ته راشي او افغان پلاوی به تهران ته سفر وکړي.

دغه پلاوي به کابل او تهران د سوداګرو پر وړاندې د پرتو ستونزو د حل لپاره څیړنې وکړي.

مومند وايي، له ګاونډیو هېوادونو او منځنۍ اسیا سره یې سوداګریزې اړیکې ښې دي او په وینا یې، له دغو هېوادونو سره له ټولو بندرونو واردات او صادرات روان دي.

مومند زیاته کړه:« له منځنۍ اسیا او ګاونډیو هېوادونو سره د افغانستان سوداګریزې اړیکې ښې دي، له حیرتان بندر واردات لرو، له  اقینې بندر، له  شیرخان بندر، له  اسلام کلا،  تورغونډۍ او  د نیمروز بندر له لارې افغانستان ته واردات کېږي.»

د پانګونې او سوداګرۍ خونه وايي، د سږني کال صادرات یې هم د تیر کال صادراتو ته نږدې دي او توپیر یې کم دی .

د مالوماتو له مخې، تېر کال افغانستان شااوخوا د ۷ سوه ملیونو ډالرو صادرات درلودل او سږ کال د دغو صادراتو کچه شپږنیم سوه ملیونه ډالره ښوول شوې ده.