Skip to content
د امریکامتحده ایالتو مرکزي بانک پرېکړه،چې د افغانستان له کنګل شوې پانګې ۳.۵ میلیارده ډالر د سویس بانک ته لیږي، تر څو یې په پراختیايي برخو یې ولګوي، پراخ غبرګونونه یې راپارولي دي.
اقتصاد پوهان اندېښنه لري،چې د دغو پيسو تقسیم به د افغانستان بانک نړیوال اعتبار زیانمن او مالي کړکیچ به زیات کړي.
د اقتصادي چارو کارپوه نور الله عزیز وايي:« د یوه هېواد نقدي زېرمه د اقتصادي قدرت ښکارندويي کوي. په دې باندې کولی شي،چې مرکزي بانک خپل پولي سیاست،چې د هغه مرسته باندې د پیسو ارزښت ساتل، یاهم د خصوصي بانکونو کارونو څارل، له هغوی سره د مرستو کول یا هم په مجموع کې د یوه هېواد اقتصادي وضعیت د ساتلو اړوند ترې استفاده کوي. نو دا چې په دې په وخت کې دغه پیسې د سویس بانک ته انتقال کېږي، د دې لپاره اړینه ده،چې دا واضح شي، چې دا پیسې د کومو شرایطو پر اساس هغو بانکونو کې ساتل کېږي.»
د اقتصادي چارو کارپوهانو په خبره د يادې شتمنۍ په اړه صلاحیت يوزاې د افغانستان بانک لري او دا ډول حیف و مېل کېدل به د افغانستان بانکونه زیانمن او ښايي د افغانۍ د بې ثباتۍ باعث هم وګرځي.
د اقتصادي چارو کارپوه میرویس حاجي زاده وايي:« دغه د افغانستان پیسې،چې ۹.۶ میلیارده ډالر دي. دا د افغانستان پانګه، د ملت پیسې او د خصوصي سکټور پیسې په دې کې دي. هېله مو دا ده،چې امریکا خپله هغه پرېکړه،چې څو میلیارده ډالر پیسې د سویس بانک ته انتقال کوي او هلته به ساتل کېږي او د هغه بانک له ادرسه افغانستان ته راشي، زما په اند باندې له دوه یا درې لاسه باید تیر شي، دا پیسې د افغانانو پیسې دي.»
د امریکا متحده ایالتو له لوري د افغانستان د کنګل شوې شتمنۍ په اړه لومړۍ او اوس دا پرېکړه له پراخو غبرګونو سره مخ ده.
د افغانستان بانک، د اسلامي امارت د بهرنیو چارو وزارت او مخکیني ولسمشر حامد کرزي دغه پرېکړه د ټولو نړیوالو اصولو خلاف او د نه منلو وړ بللې او خبرداری يې ورکړی دی،چې اجازه به ورنه کړي،تر څو د افغانستان کنګل شوې شتمني د نورو خلکو او پروژو له طریقه مصرف کړل شي.
