Skip to content
په سویلي کندهار ولایت کې د انګورو یو شمېر باغ لرونکي وايي، سږ کال یې د باران کم والي له امله د ابجوشو حاصلات د تېر کال پرتله ۸۰ سلنه کم شوي دي.
باغ لرونکي،چې اوس مهال له انګورو د ابجوشو په پروسس بوخت دي، د خپلو حاصلاتو لپاره د بازار او صادراتو غوښتنه کوي.
باغ لرونکي وايي،د مازیګر له لور راټول شوي انګور په جوش کړو اوبو او نورو کيمياوي موادو کې منځي او بيا یي ازادي هوا ته د وچېدو په موخه هواروي.
دوی وايي، سږني حاصلات يې د تېر کال په پرتله د باران له امله شااوخوا ۸۰ سلنه کم دي.
پنجوايي ولسوالۍ کې د انګورو یو تن باغ لرونکی سراج الدین وايي:« موږ ته د بارانونو زیانونه رسولي. اوس په ۱۰۰ سلنه کې ۸۰ سلنه انګور یې خراب شوي دي. له حکومته مو غوښتنه دا ده،چې ابجوشو ته مو بازار پیدا کړي. سوداګر نه شته دي. پخوا به دلته پر میدان سوداګرو ابجوشي اخېستل، خو اوس سوداګر نه شته.»
پنجوايي ولسوالۍ کې یوبل د انګورو باغ لرونکی عمر شاه بیا وايي:«دلته ابجوشو کې کار کوم. سږ کال بارانونو حاصلات خراب کړل، ډېر کم پاتې دي. که هغه خپل مصارف پوره کړي، نوره د ګټې تمه ترې سږ کال نه لرو.»
ځینې نور باغ لرونکي بيا وایي، که څه هم سږني حاصلات یې کم دي، خو کېفيت يې د تېر کال په پرتله لوړ دی.
باغ لرونکي وایي اړوندې ادارې دې يې د سږنیو حاصلاتو لپاره پر وخت بازار موندنه وکړي.
د انګورو یو تن باغ لرونکی دین محمد وايي:« باغ مو ۸۰ سلنه خراب شوی دی. ډېر زیان رارسېدلی دی. له حکومته مو غوښتنه دا ده،چې یو داسې بازار راته جوړ کړي،چې ابجوشي مو په سمه بیه وپلورل شي.»
د یاد ولایت سوداګرۍ خونې مرستیال عبدالباقي بینا هم وایي، تیرکال له کندهاره تر ۱۵ زره ټنه ډېرې ابجوشي بهرنیو هېوادونو ته صادرې شو، خو سږ کال د طوفاني بادو او بارانونو له امله د انګورو حاصلات کم شوي.
د کندهار ژړۍ، پنجوایي، میوند، ډنډ، دامان او ارغنداب ولسواليو کې د مېوو زرګونه باغونه شتون لري،چې حاصلات يې د کورنيو مارکېټونو ترڅنګ بهرنیو هېوادونو ته هم لېږل کيږي.
