د روان زېږدیز کال په اکټوبر میاشت کې د یورو اېشیا د یو مستند راپور له خپرېدو وروسته چې د بریټانوي متخصصینو په حواله یې د پاکستان تر کنټرول لاندې بلوچستان او د ایران سیستان او بلوچستان سیمو کې د کوکنارو د کرکیلې له پراخېدو خبر ورکړی و، ایران تازه ادعا کړې چې په افغانستان کې د کوکنارو کښت د پراخېدو په حال کې دی.
ایراني رسنیو د دې هېواد د نشهیي توکو پر وړاندې مبارزې ادارې عمومي منشي، حسین ذوالفقاري له قوله راپور ورکړی چې په افغانستان کې د اسلامي امارت له بیا واکمنېدو وروسته، د نشه يي توکو کښت کم شوی و، خو اوسمهال یو ځل بیا د زیاتېدو په حال کې دی.
د یوې ایراني رسنۍ د راپور یوه برخه کې راغلي: « د اسلامي امارت له لوري د نشهیي توکو د کښت او قاچاق پر وړاندې د ورکړل شوي فرمان له صادرېدو وروسته، د څو کلونو لپاره پایلې مثبتې وې، خو د شته معلوماتو له مخې، یو ځل بیا په افغانستان کې د نشهیي توکو کښت په چټکۍ سره د زیاتېدو په حال کې دی.»
د نشهیي توکو پر وړاندې د ایران د مبارزې ادارې منشي داسې مهال دا ادعاوې کوي چې د نړیوالو راپورونو له مخې، د ایران سیستان بلوچستان سوېل ختیځ د کوکنارو اصلي تولیدي سیمه ده او د رضوي خراسان شمال ختیځ، د کرمانشاه لوېدیځ، د لرستان لوېدیځ او د فارس په سوېلي سیمو کې په پراخه پیمانه کوکنار کرل کېږي چې د بریټانیایي متخصصینو له لوري دا مسئله د اندېښنې وړ بلل شوې وه.
د سیمه ییز وضعیت څارونکي بیا وایي، ګاونډي هېوادونه له دې موکې په استفادې چې افغانستان ملګرو ملتونو کې استازی او له ډېرو هېوادونو سره رسمي ډېپلوماټيک تعامل نه لري، هڅه کوي چې خپل تور لاسونه د هسې ادعاوو له مخې په افغانستان پاک کړي.
د پوهنتون استاد، شهسوار سنګروال وايي: « زه فکر کوم دا هغه دروغ دي چې دوی غواړي په خپل هېواد کې تولید کړي نشه يي توکي پر افغانستان ور وتپي. همدا اوس یو شمېر سیمه ییزو او نړیوالو رسنیو راپورونه ورکړي چې د پاکستان او ایران په یو شمېر سیمو کې کوکنار کرل کېږي او ترې تولید شوي مخدره مواد، نړۍ ته صادرېږی؛ دوی غواړي دغه تور لاسونه په افغانستان پاک کړي او دا ډول بېباکه څرګندونې وکړي.»
د اسلامي امارت چارواکو په ځلونو د ملګرو ملتونو او یوشمېر هېوادونو دا ډول بې بنسټه ادعاوې رد کړې دي.
تازه یوځل بیا د ریاست الوزراء اداري مرستیال دا ډول ادعاوې بې اساسه بولي او زیاتوي چې د نشهيي توکو د کښت او قاچاق په برخه کې یې د امیر المومنین فرمان عملي کړی او په خبره یې، هېچاته به اجازه ورنه کړي چې په هېواد کې د نشهیي توکو کښت او قاچاق وکړي.
د ریاست الوزرا اداري مرستیال، عبدالسلام حنفي وايي: « امیرالمؤمنین فرمان صادر کړ چې له دې وروسته په افغانستان کې د نشه يي توکو کښت، تولید، قاچاق او کارول بند دي. همدارنګه اسلامي امارت پرېکړه وکړه چې له پارکونو، پلونو او هرځای څخه په نشه يي توکو روږدي کسان راټول کړي، درملنه یې وکړي او بېرته یې خپلو کورنیو ته د یوه روغ انسان په توګه وسپاري. دغه پروسه په مرکز او ټولو ولایتونو کې په پرله پسې توګه ادامه لري.»
د نشهیي توکو له برخې ورها خوا، د سیاست، امنیت سوداګرۍ او نورو بېلابېلو برخو کې ګاونډیو هېوادونو په نړیوالو سټېجونو، سیمهییزو ناستو او لیدنو کې د افغانستان په تړاو بېباکه او غیر مسوولانه څرګندونې کړې چې په نړیوال باور کې خپلې ملامتیاې پټوي او افغانستان ته ګوته نیسي.