د پاکستان بهرنیو چارو وزیر د اقتصادي همکاریو سازمان (ایکو) د وزیرانو شورا په۳۰مه غونډه کې ویلي چې اسلام اباد د یوه سوله ییز، سوکاله او باثباته افغانستان غوښتونکی دی او له ټولو ګاونډویو هېوادونو سره په سوله کې ژوند کول غواړي.
محمد اسحاق ډار ټینګار کړی چې د اسلام اباد او کابل ترمنځ د اړیکو رغېدو لپاره اړینه ده اسلامي امارت د پاکستان اندېښنو ته مثبت ځواب ووايي.
اسحاق ډار زیاته کړې: « پاکستان تل د یوه سولهییز، سوکاله او باثباته افغانستان غوښتونکی پاتې شوی؛ داسې افغانستان چې په بشپړه توګه له سیمې سره مدغم وي، له خپل ځان او ګاونډیو هېوادونو سره په سوله کې ژوند وکړي. دا لیدلوری د سولې، پرمختګ او سیمهییزې همپالنې په اړه زموږ د بهرني سیاست له موخو سره سمون لري.»
د پاکستان بهرنیو چارو وزیر په خپلو خبرو کې په دې ټینګار کړی چې اسلام اباد به له کابل سره د خبرو اترو د پیاوړتیا، د کړکېچونو د کمولو او په سیمه کې د تلپاتې ثبات د ټینګښت لپاره خپلو ډېپلوماټیکو هڅو ته دوام ورکړي.
اسحاق ډار په دې اړه زیاته کړې: « باید له دغو جغرافیایي ګټو څخه په استفادې سره، پیاوړې اقتصادي اړیکې او ګډه سوکالي رامنځته شي. د سیمې هېوادونه باید د اقتصادي پرمختګ او ګډو ننګونو د حل لپاره په ګډه کار وکړي.»
که څه اسلامي امارت لا تراوسه د نوموړي دې څرګندونو ته غبرګون نه دی ښودلی، خو له دې وړاندې یې تل د سیمې هېوادونو ته ډاډ ورکړی چې هېچا ته به اجازه ورنه کړي چې افغان خاوره د کوم هېواد په وړاندې وکاروي.
افغان حکومت دغه راز له اسلام اباد دا هم غوښتي چې د افغانستان د بې ثباتۍ هڅې ودروي او کابل ته د دې ډاډ ورکړي چې تر خپل حاکمیت لاندې سیمو او فرضي کرښې ته څېرمه د ناکرارۍ رامنځته کوونکې دسیسو ملاتړ نه کوي.
خو د چارو شنونکي بیا په دې باور دي چې پاکستان تل د کرايي جګړو لپاره په سیمه کې ناامني رامنځته کوي.
د سیاسي چارو شنونکی، ډاکټر معین ګل څمکنی وايي: « دا ټولې بهانې دي، اصلي مسئله دا ده چې دوی غواړي په سیمه کې نا امني رامنځته کړي او بیا له دې نا امنیو ځانته سیاسي او اقتصادي ګټې واخلي. که پاکستان وغواړي چې له افغانستان سره ښې اړیکې ولري، په کار ده خپلې اړیکې د واقعیتونو پر بنسټ جوړې کړي.»
په دې وروستیو کې د کابل او اسلام اباد ترمنځ د ترینګلتیا کمولو لپاره هڅې زیاتې شوې دي.
په همدې تړاو، د بریټانیا ځانګړي استازي د اسلامي امارت له یو شمېر چارواکو سره تر لیدنو وروسته، اسلام اباد ته سفر کړی، ترڅو د دواړو هېوادونو ترمنځ د رامنځته شویو اختلافو د حل لپاره لارې چارې ولټوي.