بغلان کې د ۱۶۷ میلیونه افغانیو په لګښت د ډنډغوري او خوست د روغتونونو چارې پیل او د جلګې روغتون چارې بشپړې شوې
د بغلان ولایت په جلګې ولسوالۍ کې د ۵۴ میلیونه افغانیو په لګښت د ۳۰ بستریز روغتون د جوړولو چارې بشپړې، په خوست او ډنډغوري ولسوالیو کې د دوه ۳۰ بستریزو روغتونونو د جوړولو چارې د ۱۱۳ میلیونه افغانیو په لګښت پیل شوې.
د یادو روغتیايي پروژو د پرانیستې او چارو د پیل په مراسمو کې د عامې روغتیا وزیر مولوي نورجلال جلالي، د بغلان والي الحاج مولوي عبدالله مختار، د عامې روغتیا وزارت د پلان او پالیسۍ رییس، ډاکټر سیدرسول منګل، سیمهییزو مسوولینو او د سیمې اوسېدونکو ګډون کړی و.
د عامې روغتیا وزیر، مولوي نورجلال جلالي وايي، د هېواد په کچه روغتیايي خدمتونو ته د خلکو د لاسرسي په موخه هڅې روانې دي، ترڅو د خوست، جلګې او ډنډغوري ولسوالیو په څېر په نورو سیمو کې هم روغتونونه جوړ او خلکو ته معیاري روغتیايي خدمات وړاندې شي.
نوموړی زیاتوي، تر دې مهاله د هېواد په ۳۱۸ ولسوالیو کې د روغتونونو جوړولو چارې پیل شوې دي او عامې روغتیا وزارت هڅه کوي چې روغتیايي خدمتونه هغو سیمو ته هم وغځوي چې خلک یې له روغتیايي ستونزو سره مخ دي.
د عامې روغتیا وزیر، مولوي نورجلال جلالي وايي: « موږ د دې لپاره بشري او نورې سرچینې په پام کې نیولې دي او د تجهیز لپاره یې هم پلان لرو. نور به زموږ د دې ولسوالیو خلک اړ نه وي چې د ولایت روغتون یا هم مرکز ته خپل ناروغان ولېږدوي.»
بله خوا، بغلان والي مولوي عبدالله مختار وايي، د جلګې ولسوالۍ د ۳۰ بستریز روغتون چارې د ۵۴ میلیونه افغانیو په لګښت بشپړې شوې دي. دغه راز، په خوست او ډنډغوري ولسوالیو کې د ۳۰ بستریزو روغتونونو د جوړولو چارې پیل شوې چې په جوړېدو سره به خلکو ته ګڼې اسانتیاوې رامنځته شي.
بغلان والي زیاته کړې: « دا مهال د بغلان ولایت په خوست ولسوالۍ کې د همدې ډول یوه روغتون پرانسته وکړه او مازدیګر مو هم په جلګه ولسوالۍ کې جوړ روغتون ګټه اخستنې ته وسپاره. نن دلته حاضر یو او څو ورځې وروسته به د پلخمري ۱۰۰ بستریز ملکي روغتون چارې هم پرانستل شي.»
بل پلو، د بغلان عامې روغتیا رییس محمد حسن عاصم وايي، اوس مهال د ولایت په بېلابېلو برخو کې خلکو ته روغتیايي خدمتونه وړاندې کېږي او هڅې روانې دي چې هغو سیمو ته هم روغتیايي خدمات وغځول شي چې تر دې وړاندې له دغو خدمتونو بېبرخې پاتې دي.
د بغلان عامې روغتیا ییس، مولوي محمد حسن عاصم وايي: « نن مو د بغلان په خوست او جلګه ولسوالیو کې د دوو روغتونو پرانسته لرله. یوه په خوست ولسوالۍ کې عمومي شفاخانه وه چې د عامې روغتیا وزیر او بغلان والي په حضور کې، پرانستل شوه.»
په همدې حال کې، د عامې روغتیا وزارت د پلان او پالیسۍ رییس، سیدرسول منګل وايي چې له دغو روغتیايي مرکزونو به د جلګې، خوست، فرنګ ، ګذرګاه نور، ډنډغوري او دهنه غوري ولسوالیو اوسېدونکي ګټه پورته کړي او د روغتیايي خدمتونو د پراختیا په برخه کې به مهم رول ولوبوي.
