د پکتیا ولایت ډنډ پټان او د پښتونخوا کورمې ایجنسۍ د خرلاچي لاره له تیرو شپږو ورځو راهیسې د افغانستان اسلامي امارت له لوري تړل شوې ده.
اسلامي امارت دغه لاره د هغې کړنې په غبرګون کې تړلې ده،چې څو ورځې وړاندې پاکستاني ځواکونو پر مسافرو ډزې وکړې او له امله یې یو کس ووژل شو او دوه نور ټپیان شول .
د پکتیا اطلاعاتو او کولتور ریاست مشر خالقیار احمدزی وايي:« دامهال دغه لار د تګ راتګ پر مخ تړل شوې ده. هېله شته دی،چې ژر به پرانېستل شي. البته دغه لار د افغان لوري لخوا تړل شوې او که مزاکرات پایله ورکړي،نو خلاصه به شي.»
د فرضي کرښې دواړو غاړو ته زرګونه بار وړونکي موټر ولاړ دي او موټر چلوونکي د لارې ژر پرانېستلو غوښتنه کوي.
یو تن موټر چلووونکی وايي:«شپږ ورځې کېږي،چې د دغې لارې تړل کېدو له امله دلته ولاړ یو. د دې مالومات نه کېږي،چې کله به لاره خلاصېږي.»
