د پاکستاني حکومت پر وړاندې وسله وال تحرکات اوږده مخینه او متفاوت عوامل لري، خو د ګڼو وسله والو خوځښتونو مخ په زیاتېدونکي تحرکات بیا هغه څه دي چې د دې هېواد واکمن حکومت یې په امنیتي، سیاسي او اقتصادي برخو کې له سختو ننګونو سره مخ کړی.
راپورونه کاږي، د پاکستاني ځواکونو پر وړاندې د بېلابېلو وسله والو جبهو ترڅنګ، یو بل نوی غورځنګ هم د اتحاد المجاهدین تحریک یاد شوی چې د ملګرو ملتونو د راپور پر بنسټ، په دې هېواد کې یې له ۲۰۲۵ زېږدیز کال راهیسې وسله وال فعالیت پيل کړی.
که څه هم دې ډلې د خپلو فعالیتونو ډېر تبلیغات په رسنیو نه دي څرګند کړي، خو تازه یې په ټولنیزو رسنیو یوه نسبتا اوږده(۱۳ دقیقې) ویډیو خپره کړې چې د پاکستاني ځواکونو پر وړاندې د چریکي جګړې عملیات په کې ښودل کېږي.
د سیمه ییز وضعیت څارونکي په دې باور دي چې که اسلاماباد خپله تعقیب کړې سیاسي او امنیتي سټراتیژي بدله نه کړي، د دې ډېر امکان شته چې په دې هېواد کې د خپل حاکمیت لویه جغرافیه له لاسه ورکړي.
د پوځي چارو شنونکی اختر محمد راسخ وايي: « که چېرې پاکستان خپله سیمه ییزه سټراټيژي چې د سیمې نا امنه کول دي، بدله نه کړي، پاکستان له تجزیې سره هم مخ کېږي، په سیاسي، اقتصادي او نړیواله ازوا کې به ډوبېږي. هغه لوبه چې له ترورېزم سره د مبارزې لپاره پاکستان پيل کړې وه، نړۍ، سیمه ییزو هېوادونه او خپل ولسونه یې پر پوه شوي، ولس او سیاسي رهبران یې د نظام پر وړاندې د درېدو په حال کې دي. دا وضعیت به داسې حال ته ځي چې په پاکستان کې به د یوه بل خونړي انقلاب لامل شي.»
د سیاسي چارو شنونکی عزیز معارج وايي: « په پاکستان کې د اتحاد المجاهدین ډله په ۲۰۲۵ کال کې جوړه شوه چې په کې درې ایتلافي ډلې شاملې دي(حافظ ګلبهادر ډله، لشکر السلام ډله او حرکت انقلاب اسلامي پاکستان ډله). راپورونه وايي چې دا ایتلافي ډله دا مهال ۵۰۰ غړي لري او محمود الحسیني یې د رسنیو ویاند. فکر کوم دا ډله کوم مشخص مشر نه لري.»
په ټولنیزو رسنیو د اتحاد المجاهدین د نویو وسله والو فعالیتونو د خپرېدو ترڅنګ، په بلوچستان کې بلوڅ ازادي غوښتونکي غورځنګ(بي.اېل.اې) هم د خپلو وروستیو پوځي عملیاتو لنډه ویډیو خپره کړې. بلوڅانو ادعا کړې چې په تازه عملیاتو کې یې په قلات ښار کې د پاکستاني ځواکونو ۶ تنه وژلي او یو شمېر نور یې ټپیان کړي دي.
بې.اېل.اې ته منسوبو ادرسونو ویلي، په بلوچستان کې پر پاکستاني ځواکونو د بلوڅ ازادي غوښتونکو بریدونه زیات شوي چې یوازې د روانې اوونۍ په اوږدو کې له شلو زیات پاکستاني ځواکونه په کې وژل شوي.
باور دا دی چې د پاکستان حکومت تر حاکیمت لاندې سیمو کې د ناامنیو تشدید بېلابېل عوامل لري چې عمده هغه یې په دغو سیمو کې له خلکو د بنسټيزو حقونو اخستنه او د هغوی د سوله ییزو حق غوښتونکو مبارزو پر وړاندې ناسم چلن بلل کېږي.
