په بلخ کې د تېلو د بیو کنټرول او په بازارونو کې د بیو د ثبات په موخه، د نفتو توکو د لیلام لړۍ پیل شوه.
د بلخ سوداګرۍ او پانګونې خونې مسوولین وایي، تېره ورځ یې ۱۱۰۰ ټنه ۹۲ پټرول لیلام کړي او دا لړۍ به د بازار د اړتیا له مخې دوام ولري.
د مسوولینو په خبره، دا مهال په هېواد کې د یوه ټن پټرولو بیه شاوخوا ۱۵۵۰ ډالره ده، خو د لیلام له لارې دغه بیه ۱۵۲۰ ډالرو ته راټیټه شوې.
د بلخ سوداګرۍ او پانګونې خونې مرستیال هارون رشید قاضي وايي: « له دې وړاندې د یو ټن پټرولو بیه ۱۵۵۰ ډالره وه، خو موږ په ۱۵۲۰ ډالرو خرڅ کړل. د نن لپاره ۱۱ ټنه بازار ته وړاندې شول او دا لړۍ به ادامه ولري. موږ تمه لرو چې نور شرکتونه هم ورته ګامونه پورته کړي.»
په ورته مهال، د تېلو سوداګر د نفتي توکو لیلام له بهیر څخه هرکلی کوي. دوی وایي، که دغه لړۍ دوام ومومي او بازار ته په مناسب قیمت نفت وړاندې شي، ورسره به د تېلو بیې راټیټې او مصرفوونکو ته به اسانتیاوې برابرې شي.
د تېلو سوداګر عبداللطیف وايي: « دوی یوه اندازه تېل په تخفیف سره وپلورل. له دې سره زموږ د هېوادوالو خاطر جمع کېږي، ځکه موږ په خپلو زېرمو کې کافي تېل لرو. له دې وروسته موږ ته ستونزې نه پېښېږي.»
د تېلو سوداګر محمد نادر ساپی وايي: « زه ستاسو د میډیا له لارې په ټولو سوداګرو غږ کوم چې داسې ګامونه پورته کړي چې د نرخ لوړېدو مخه ونیول شي.»
بله خوا، مزارشريف کې د نفتو اتحادیې مسوولین وایي، د نفتو د بیو د کنټرول لپاره د وارداتو زیاتول کولی شي په بازارونو کې د بیو پر ثبات اغېز وکړي او د تېلو د بیو له ناڅاپي لوړېدو مخه ونیسي.
دوی له اسلامي امارت غواړي چې بهرنیو هېوادونو کې د افغان سوداګرو لپاره قراردادونه ډېر کړي، ترڅو د وارداتو کچه زیاته او د نفتو بیې راټیټې شي.
بلخ کې د نفتي توکو اتحادیې مرستیال کامبیز صدري وايي: « باید اسلامی امارت هم ځینې سهولتونه جوړ کړي، لا ډېر قراردادونه وکړي، ترڅو د تېلو له کمښت مخه ونیول شي. موږ له نورو سوداګرو هم هیله لرو چې د یما پټرول شرکت په څېر په نورو بندرونو کې هم تېل په ټیټه بیه لیلام کړي.»
بلخ کې د لومړي ځل لپاره ۱۱۰۰ ټنه پټرول په داسې حال کې لیلامېږي چې په دې وروستیو کې د نفتي توکو او په ځانګړې توګه پټرولو، ډیزلو او اوبلن ګاز د بیو له لوړوالي څخه د خلکو شکایتونه ډېر شوي دي.
د نفتو سوداګر د بیو د لوړوالي لاملونه په نړیواله کچه د روسیې_اوکراین او د ایران – امریکا ترمنځ جګړې بولي او وايي، له امله یې د لارو بندېدو هم د انرژۍ پر نړیوال بازار سیوری غوړېدلی.
